دی بلوچستان پوسٹ نیوز ڈیسک ءَ سربیتگیں یک تامر بندے ءِ رد ءَ بختیار آباد ءِ جھمنندیں نواز نامی ایں مردءِ گوں وتی لوگ بانک ءَ تامر بند ءِ تہءَ اے بھتام جنگ ءَ اِنت کہ آئی جِنِک لمی گوستگیں روچاں زورآوریں مردماں چِست کُتگ ءُ بُرتگ کہ آئی درگت ءَ داں انگت ھچ پئیمیں اھوال نیست کہ کجءَ اِنت۔
آئی گُشگ اَت جرم کارانی زورآور بئیگ ءِ سوب ءَ پولیس آیاں دزگیر کنگ ءَ نہ اِنت وھدیکہ قبائلی سردار ءِ زھگ اے مردمانی کمک ءُ مستری کنگ ءَ اِنت۔
آئی ءَ گُشت کہ اختیار ء قادر بخش وزیرانی ءِ مستری ءَ جرمکاراں مئے جِنِک زور چِست کُتگ ءُ بُرتگ۔ اللہ بزانت مئے چک کجام جاورانی تہءَ اِنت۔ بیگواہ کنوک مئے جِنِک ءَ کُش اَنت۔
آئی ءَ چیف جسٹس سپریم کورٹ، چیف جسٹس ہائی کورٹ بلوچستان، آئی جی بلوچستان، ڈی آئی جی نصیر آباد، ایس ایس پی نصیرآباد ءَ ھوار دگہ پھازگی گلاں چہ وتی جِنِک ءِ یل کنائینگ ءِ دزبندی کُتگ۔
وھدیکہ اے درگت ءَ واکدارانی ھچ پئیمیں لیکہ داں انگت دیما نئیتکگ۔