زھگ سلاہ بندیں مردماں چہ لوگ ءَ آوار جتگ، پولیس ارزی ءَ نبشتگ کنگ ءَ نہ اِنت – حمیدہ بی بی

بلوچستان ءِ دمگ کیچ ءِ بنجاھی شھر تربت ڈاکی بازار آبسر ءِ جھمنندیں شاہ میر ءِ لوگ بانک حمیدہ ءَ تربت ءِ پریس کلب ءَ پریس کانفرنس ءِ کنان ءَ گوشتگ کہ منی بیست سالی ئیں ورناہ حسن ء شاہ میر سَے روچ ءَ پیسر سلاہ بندیں مردماں چک لوگ ءَ آوار جتگ ءَ بیگواہ کرتگ وھدیکہ ما کہ پولیس ءِ گور ءَ شتگیں ارزی ءِ نبشتگ کنگ ءَ پولیس ءَ ارزی نبشتگ نہ کرتگ چوشکہ ما آوار جنوکاں زان ایں آیانی بارہ ءَ سرپدی ما پولیس ءَ داتگ اَنت چریشی ءَ ابید ھم پولیس نانکہ منی زھگ ءَ یک کنائینگ اِنت نانکہ آوار جنوکانی ھلاپ ءَ ارزی ءَ نبشتگ کنگ اِنت –

آئی ءَ گوشتگ کہ حسن ءِ آوار جنگ ءَ یک روچے پیسر ھمے پرائیویٹ سلاہ بندیں مردماں گوں مئے دپ جاک بیتگ ءُ چریشی ءَ پد آ فون ءِ سر ءَ یکشل ءَ بیھار دیگ ءَ اَنت، آوار جنگ ءَ پیسر مئے لوگ ءَ اشاں اُرش کرتگ ءُ مارا لٹ ءُ کُٹ کرتگ ءُ چریشی ءَ ما ٹپ ءُ ٹور بیتگیں ءُ ما نادراہ جاہ ءَ شتگیں ءُ ما وتی درمانی کرتگ –

آئی ءَ گوشت کہ آوار جنوکاں وت ءَ سرکاری کارمند گوشتگ ءُ مار ءَ انگت بیھار دیگ ءَ اَنت بلے ما سرپد ایں آ پرائیویٹیں مردم اَنت – ما کمشنر مکران، ڈپٹی کمشنر کیچ ءُ ایف سی ءِ واکداراں گوں انساپ ءِ دزبندی ءَ کن ایں ءُ مئے زھگ ءَ آوار جنوکانی دست ءَ آجو بہ کنائینت ءُ مئے کمک ءَ بہ کن اَنت –

آئی ءَ گوشت کہ ما دمگ ءَ نیزگاریں ءُ تنگدستی ءِ سبب ءَ میر ءُ معتبراں گوں سیادی نہ داریں ءُ زھگ ءِ واستا دو مزن نامیں مردماں گوں رھوت کتگ آیاں کمک کنگ ءَ انکاری کرتگ، پولیس ھم زھگ ءِ آوار جنی ءِ ارزی ءَ نبشتگ نہ کنگ ءَ اِنت مئے دزبندی اِنت کہ سیاسی پاٹی مئے توار بہ بنت ھمے رنگ ءَ کمشنر مکران، ڈپٹی کمشنر کیچ، ڈی پی او، آئی جی پولیس ءُ ایف سی ءِ واکداراں گوں دزبندی اِنت زھگ ءِ یل کنگ ءَ وتی کرد ءَ پیلو بہ کن اَنت –