گوادر: آل پارٹیز ءِ نیمگ ءَ ایس ایچ او گوادر ءِ بدل کنگ ءَ آپ ءِ نہ بوگ ءَ نندانکی ھرتال بیتگ

بلوچستان ءِ تیابدپی شھر چہ گوادر ءَ سر بیتگیں ھالانی رد ءَ مروچی آل پارٹیز ءِ باسکانی نیمگ ءَ میرین ڈائیو دگ بند کنگ بیتگ، زھرشانی نندانک ءَ بازیں کچے ءَ مھلوک ءَ بھر زرتگ –

آل پارٹیز ءِ گوشتگ ءُ لوٹ کرتگ ءُ گوشتگ کہ دانکہ ایس ایچ او گوادر بدل کنگ نہ بیت ءُ دمگ ءَ گلینگ نہ بیتگ ءُ گوادر ءَ آپ ءِ جیڑہ ھلاس کنگ نہ بیت ءُ زر ءَ درامدیں گیرکانودی ٹرالنگ ءِ سرجم ءَ بند کنگ نہ بنت اے زھرشانی نندانک برجاہ مان ایت –

چریشی ءَ پد زھرشانی نندانک ءَ آل پارٹیز ءِ دُچار کپگ ءَ ڈپٹی کمشنر گوادر اتکگ ءُ سر بیتگ ءُ گپ تران ءَ نندانک ھلاس کنگ بیتگ –

نندانک ءَ زھرشانی کنوکاں لوٹ کرتگ ءُ گوشتگ کہ گوادر ءِ ایس ایچ او بدل کنگ ءُ دمگ ءَ گلینگ بہ بیت ءُ سعید اھمد ءِ ھلاپ ءَ بیتگیں ارزی واتر کنگ بہ بنت –

ڈپٹی کمشنر ءَ زھرشانج نندانک ءَ نشتگیں مردمانی گپ منّ اِتگ ءُ دَہ روچ ءِ وھد لوٹ اِتگ –

ڈپٹی کمشنر گوادر ءَ گوشتگ کہ دَہ روچ ءِ تہ ءَ اے ارزی نامہ ءُ دگہ جیڑہ گشینگ بنت ءُ چریشی ءَ پد نندانک ءَ نشتگیں مردماں زھرشانی ھلاس کرتگ ءُ وتی زھرشانی ھلاس کرتگ –

زانگ بہ بیت سعید اھمد بلوچ یک جون ءَ گوادر ءِ پولیس ءَ لوگ ءَ دزگیر کرتگ ءُ آئی ءِ دزگیر ءُ لوگ ءِ دودانی لگتمالی ءِ ھلاپ ءَ مھلوک ءَ زھرشانی کرتگ ءُ لھتے ادارانی تہ ءَ سعید اھمد بلوچ یل کنگ بیتگ اَت –

گوادر ءَ ھوار جیونی، اورماڑہ ءُ دگہ جاھاں تَھ آپی ءِ سبب ءَ مھلوک یکشل ءَ دگانی سر ءَ گندگ کاینت ءُ مھلوک ءِ گوشگ اِنت کہ مئے گور ءَ ترمپ ءِ آپ نیست ءُ ما اے لھڑ ءَ بے کساس آپ ءِ بوگ ءَ جنجالانی دیمپان اِنت –