گوستگیں روچاں بلوچستان ءِ بنجاھی شھر شال ءَ چہ لشکریانی دست آوار جنگ بیتگیں بلوچ ورناہ کوہ پیما (کوہ سوار) منصور قمبرانی داں انگت بیگواہ اِنت۔ پانزدہ روچ گوزگ ءَ پد ھم آئی درگت ءَ ھچ پئیمیں اھوال نہ رستگ اَنت۔
مروچی منصور قمبرانی ءِ مات ءُ کہول ءِ دگہ مردماں شال پریس کلب ءِ دیما بیگواھیں مردمانی یل کنگ ءِ ھاترءَ جتگیں وائس فار بلوچ مسنگ پرسنز ءِ بنجل ءَ اتکگ ءُ زھرشانی ءَ بھر زرتگ ءُ منصور ءِ زورانسری بیگواھی ءِ درگت ءَ سرجمیں اھوال وی بی ایم پی ءَ نبشتھی دروشم ءَ داتگ اَنت۔
ھمے وھد ءَ منصور قمبرانی ءِ مات ءِ گُشگ اَت کہ پانزدہ روچ پیسر شپ ءِ دوازدہ ءِ وھد ءَ مئے لوگ ءِ دروازگ لشکریاں جتگ ءُ من دروازگ پچ کُتگ۔
آئی ءَ گُشت کہ لشکریانی گوشگ ءِ پدءَ من منصور چہ واب ءَ پاد کُتگ، لشکریاں منصور ءَ برگ ءِ وھدءَ گشتگ اَت کہ ما یک ءُ دو گپانی درگت ءَ جست ءَ پد منصور یل کن ایں بلے سرجمیں پانزدہ روچ گوزگ ءَ پد منصور داں انگت بیگواہ اِنت۔
منصور ءِ مات ءِ رد ءَ پولیس ءُ دگہ سیاھیں پوشاک گوریں کارمند آ شپی مئے لوگ ءَ اتکگ اَنت۔ آئی ءَ جُست گران ءَ گُشت کہ مارا گُشگ بہ بیت کہ منصور کُج ءُ اِنت چونیں جاورانی تہءَ اِنت، آئی میار چی اِنت کہ پانزدہ روچ گوزگ ءَ پد ھم آ زورانسری بیگواھی ءِ آماچ کنگ بئیگ ءَ اِنت۔
زانگ بہ بیت کہ منصور قمبرانی یک کوہ پئیما (کوہ سوار) اِنت ءُ مرید ایڈوینچر کلب ءِ باسک اِنت۔ واکدارانی نیمگ ءَ چہ داں انگت منصور ءِ بیگواھی ءِ درگت ءَ ھچ وڑیں لیکہ دیما نئیتکگ۔