بلوچستان ءَ کرونا نادراھی ءَ دگہ دو کس بیران

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ دگہ دو کس بیران بوتگ ءُ یک سد ءُ سَے نوکیں نادراہ پدر بیتگ انت –

بلوچستان ءِ جانسلامتی ءِ نیمگ ءَ شنگ بوتگیں رپورٹ ءِ رِد ءَ گوستگیں روچ ءَ بزاں سَے شمبے ءَ بلوچستان ءَ نُھ سد ءَ بیست مردماں کرونا نادراھی ءِ ٹیسٹ کنگ بوتگ اَنت کہ آھانی تہ ءَ یک سد ءُ سَے مردماں کرونا نادراھی پدر بوتگ –

رپورٹ ءِ رِد ءَ شال ءَ سی ءُ چار کیچ ءَ چل ءُ پنچ، چاگی ءَ نُھ، ھزدار ءَ شش، لسبیلہ ءَ چار ، گوادر ءَ دو، بارکھان، پنجگور ءُ سبی ءَ یک یک مردمے ءِ کرونا وائرس ءِ آماچ بوتگ انت – چریشی ءَ پد تنی وھدی بلوچستان ءِ تہ ءَ کرونا نادراھی آماچ بوتگیں مردمانی کچ نوکیں کساساں ھوار سرجمی ءَ بیست ءُ شش ھزار ھپت سد ءُ ھپتاد شش ءَ سربوتگ انت – رپورٹ ءِ رِد ءَ بلوچستان ءِ تہ ءَ بیست ءُ چار ادارانی میان ءَ کرونا وائرس ءِ شست ءُ شش نادراہ وش بوتگ انت، وش بوتگیں مردمانی کچ نوکیں کساسیاں ھوار بیست ءُ پنچ ھزار ھپت سد ءُ بیست ءُ چار سربوتگ انت –

رپورٹ ءِ رِد ءَ گوستگیں روچ ءَ کرونا نادراھی ءَ دگہ دو مردم بیران بوتگ اَنت ، بیران بوتگیں مردمانی کچ نوکیں کساساں ھوار سَے سد ءُ سَے ءَ سر بوتگ انت- بلوچستان ءَ تنی وھدی کرونا نادراھی ءِبیست ءُ چار نادراہ ھسپتالانی تہ ءَ ھائی فلو آکسیجن ءِ تہ ءَ الاج انت – بلوچستان ءِ تہ ءَ کرونا نادراھی گیش تالان بوگ ء یانزدہ بما نوزدہ درسد بوتگ –