روکپتی بلوچستان ءَ سَے ماھانی تہ ءَ ھپتاد ءُ دو مردم کُشگ ءُ زدگ کنگ بیتگ اَنت

روکپتی بلوچستان ءَ بازیں وھداں ناشناسیں سلاہ بندیں مردمانی نیمگ ءَ یکشل ءَ لس مردم نشانگ کنگ بیگ ءَ اَنت ءُ چریشانی تہ ءَ بازیں مردم باپاری مردم گوشگ بیتگ اَنت –

چہ روکپتی بلوچستان ءَ انسانی ھکانی واستا کار کنوکیں مردمانی نیمگ ءَ شنگ بیتگیں رپورٹ ءِ رد ءَ ایرانی نوکیں سال ءِ بنداتی سَے ماھانی تہ ءَ ھپتاد ءُ دو مردم کُشگ ءُ زدگ کنگ بیتگ اَنت –

رپورٹ ءِ رد ءَ ناشناسیں سلاہ بندیں مردماں ھوار ایرانی لشکر ءِ تیرگواریاں نوکیں بنداتی سَے ماھانی تہ ءَ روکپتی بلوچستان ءِ بازیں جاھاں تنی وھدی شست ءُ یک مردم تیرباران کنگ ءُ کشگ بیتگ اَنت ءُ یازدہ مردم زدگ کنگ بیتگ اَنت –

رپورٹ ءِ رد ءَ گوشگ بیتگ کہ اے وئیل سیستان ءُ بلوچستان ءِ بازیں جاھاں پیش اتکگ اَنت ءُ سلاہ بندیں مردماں ھوار ایرانی لشکر ءِ تیرگواریاں پیش اتکگ اَنت –

رپورٹ ءِ رد ءَ گوشگ بیتگ کہ اے وئیل روچ پہ روچ گیش بیان اَنت ءُ بازیں ھنچیں وئیل اَنت کہ لس مردم رھگوزی جنگ ءُ کُشگ بیتگ اَنت ءُ آیانی رد ءَ روکپتی بلوچستان ءَ انسانی ھکانی پادمالی بیگ ءَ اِنت ءُ اے وئیلانی دارگ ءَ انسانی ھکانی گل وتی دلگوش ءَ گور بہ کن اَنت –

روکپتی بلوچستان ءَ لس مردمانی بھتام اِنت کہ ایرانی لشکر ءَ لس مھلوک سلاہ بند کرتگ ءُ سیستان و بلوچستان ءَ یلو بوج کرتگ اَنت چریشی ءِ سبب ءَ سلاہ بند لس مردمانی کوشاں کنگ ءَ اَنت –

ایرانی لشکر ءِ واکدارانی نیمگ ءَ چوشیں گپانی راستی ءِ ھال تنی وھدی واکدارانی نیمگ ءَ شنگ کنگ نہ بیتگ اَنت ءُ نانکہ کوشانی بارہ ءَ گوشگ بیتگ اَنت –