کیچ ءَ پاکستانی پوج ءِ سر ءَ اُرش، اُرش ءِ زمّہ واری بی ایل ایف ءَ منّ اِتگ

بان پیر ڈک ءَ پاکستانی پوجی پانگس ءِ سر ءَ دورجنگیں توپک ءَ گون اُرش کتگ یک کارمندے کشتگ ءُ یکے زدگ کتگ – میجر گوھرام بلوچ

سربوتگیں ھالانی رِد ءَ مروچی ناشناسیں سلاہ بندیں مردماں گومازی ءُ اپسی کھن ءِ میانی دمگ بان پیر ڈک ءَ برجاھیں پاکستانی پوج ءِ پانگس ءِ سر ءَ اُرش کتگ – دمگی مردمانی رد ءَ اُرش ءَ پاکستانی پوج ءَ جانی تاوانانی دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں مروچی سَے شمبے ءِ سُھب ءِ ادار دہ ءَ کیچ ءِ دمگ اپسی کھن ءُ گومازی ءِ میان ءَ بان پیر ءِ ڈک ءَ کوہ ءِ سر ءَ برجاھیں پاکستانی پوج ءِ پانگس ءِ سر ءَ دورجنگیں توپک ءِ گون ءَ اُرش کتگ- چہ اُرش ءَ پاکستانی پوج ءِ یک کارمندے مرتگ ءُ یکے ٹپی بوتگ –

جارکش ءَ وتی درشان ءِ گڈسر ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –