نبشتانک: من برھنگ باں
نبشتہ کار: شاری بلوچ
دی بلوچستان پوسٹ
آئی ءَ بلوچی ءِ سالتاک گون ات ھما تاک کہ سال ءِ پُرّی ءَ در کیت اتک ءُ ھما منجیں کھیر ءِ ساھگ ءَ نشت ھما روچ ءَ کہ بازار لڈ اِتگ اَت ءُ آئی ءِ توامیں بیل ءُ ھمبل چہ آئی ءَ دور رپتگ اِتاں آ مدام گوں وتی تھنائی ءَ دیوان کنگ ءَ ھمے کھیر ءِ ساھگ ءَ اتک ءُ نشت مرچی آئی ءَ وتی کمرزانی جتگ اَت ھما لڈّ اتگیں بازار ءِ رو ایرشتی نیمگ ءِ کوھنیں کبرستان ءَ پرشتگیں کبرے ءِ کنکّ ءَ نشتگ اَت۔
من آئی ءِ گڈی دیدار ھما روچ ءَ کتگ اَت کہ آ پہ منجیں کھیر ءَ رپتگ اَت بلے کھیر کسے ءَ چہ بُنڈ ءَ گُڈّ اتگ اَت ءُ آ پہ گوں دل ءِ اُپّاراں واتر پہ ھما لڈّ اتگیں بازار ءَ روگ ءَ ات کہ آئی ءِ مِھرانی ھنکین بوتگ آئی ءَ وتی سرجمیں کسانی ھمے بازار ءَ گوں وتی ھمبلانی ھوری ءَ پہ شادہ ءُ لیب ءُ گْوازی گْوازینتگ اَت۔ آ ھر وھد کہ اے بازار ءَ اتکگ گڈا آئی ءِ دوار ھمے منجیں کھیر اَت۔
مرچی کہ من آئی ءَ را کبرستان ءَ دیست منی باتن ءَ یک بیمے ودیگ بوت، تُرسے جان ءَ کپت منی سر ھچ پِر بوگ ءَ نہ اَت من دل ءَ جیڑ اِت من ءَ نہ گوں اے بازار ءَ چشیں مھرے بوتگ نہ منجیں کھیر پہ من سارتیں ساھگے بوتگ نہ منی کسانی ءِ لیب جاہ ءُ نہ مھریگ ایں زھیرانی رندے ادا نکشیت گڑا منی بے تاھیری ءِ سوب چی اِنت کہ من اے ڈول ءَ دلوارگ آں-
داں ھمنچک ءَ گُشئے آئی ءِ گالوار منی گوشاں کپگ ءَ اَت آ گوں پرشتگیں کبر ءَ ھمے گشگ ءَ اَت ”تو باریں کدی چہ اِد ءَ لڈّے روئے؟ اگاں کہ رپت ئے گڑا من ءَ گوں وتی پاداں بَر گوں کہ منی تھنائی ءِ اکس تئی گْور ءَ اِنت من برھنگ باں“۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔