نبشتانک: مئے ڈگاراں دِھکان نیست
نبشتہ کار: میرین بلوچ
دی بلوچستان پوسٹ
بیست ءُ سَے سال ءَ پیسر مئے مُلک ءُ ڈگار ویران اِت اَنت نہ واجکارے ءُ نیکہ دھکان ءُ شریک ءِ ھستگ اَت مئے مُلک ءُ ڈگارانی سر سک ءَ دْراج کہ آئی ءِ سر گوں میلاں سر اِت اَنت ، پمیشکا آ گوں کس ءَ آباد نہ بوت اَنت پہ اِیشانی آباد کنگ ءَ لھتے ءَ جُھد کُت، بلے شرّیں وڑے ءَ سوب مند نہ بوت اَنت مئے پت مئے پیداک بُوَگ ءَ ساری بیران بوتگ اَت ، انچُوش گْوش انت کہ مئے مات ءَ پد ءَ نوکیں آروسے کُتگ بلے ما نہ زان اِیں! مات ءَ نوکیں آروس پہ وشی کُتگ یا پہ زور دَیَگ بوتگ ءُ مات مرچاں بے زبان ءِ اِنت ، بلے مات ءِ مستریں بچک واجل ءَ گْوشت کہ من اے ملک ءُ ڈگاراں کِشت ءُ کِشار کن آں بازار ءِ مردُم دلپروش اِت اَنت کہ واجل گنوک اِنت، اے بلائیں پٹ ءُ میدان ءِ سرے باریں تاں کُجا اِنت اے گوں واجل ءَ آباد نہ بہ اَنت یکّے ءَ درائینت کہ واجل جزباتی اِنت ءُ آئی ءَ اے بابت ءَ ھچّ وڑیں تجربہ نیست واجل نوں پکّا گنوک اِنت بِلے واجل گوں پنچ ءُ شش براتاں کار بنا کُت ءُ من کسان اِت آں ءُ ھمے وڑ ءَ چہ اے کار ءَ ناآشنا اِت آں، پنچ ءُ شش ماہ ءَ پد بازار ءِ مردُم ھیران بوتاں کہ واجل وَ سکّ ءَ بودناکیں مردُمے گُڑا لھتیں بازار ءِ مردُم گوں واجل ءَ ھمگام بوت کہ ڈگاراں کارے کن اِیں ءُ پہ وتی آیوکیں باندات ءَ یک وشّی یے کار اِیں چاردہ سال ءَ پد اے مُلک ءُ ڈگار سک سبز ، درچک ءُ کِشاراں بے کِساس آپ وارتگ اَت ، چی ءَ کہ درچکاں بے آپ ءَ نہ بیت ھمے وڑ ءَ واجل ءُ آئی ءِ دھکان ءُ شریکّ پہ وتی وشی ءُ شادمانی ءَ آپ دات اَنت ءُ تنیگا دَیَگ ءَ اَنت –
بلے ڈگارانی سر ءَ ناھار ، ھپتار ءُ دِگہ بازیں جِناور ھستگ اَت کہ کِشار اِش لپاشتگ اَت واجل ءُ آئی ءِ دھکان ءُ سنگتاں شپے پنچ ءُ شش ناھار ءُ ھپتار جت زِند دیم ءَ تیلانک گِران اَت واجل ءُ آئی ءِ دھکان ءُ سنگتاں روچ ءَ کار کُت ءُ شپ ءَ ناھار ءُ ھپتاراں گوں سر ءُ لینڈ بوت اَنت اناگاہ ءَ یک روچے ءَ ناھار ءُ ھپتاراں واجل ءَ انگرّ کُت ءُ واجل ءِ بچگ ءِ ھِچّ وڑیں راہ ءُ درے پشت نہ کپت ، بلے واجل ءِ دل ساپ اَت ءُ ھُداوند واجل ءِ ھمراہ اَت ھمے سکیں ساھت ءَ واجل ءِ سنگت اتک اَنت ءُ ناھار ءُ ھپتاراں گوں جنگ دات ، ناھار ءُ ھپتارانی بازینے جَنَگ بوت ءُ بازینے پہ تچگ ءُ رَوَگ ءَ سوب مند بوت، بلے ھمے ناھار ءُ ھپتارانی جنگ ءَ واجل ءِ دو سنگت شھید بوت ءُ واجل تاں ھشت روچ ءَ شُد لاپ اَت ، بیدے چہ آپ ءَ دِگہ وردنی سامان ھچّی نیستگ اَت چوش کہ ھُداوند واجل ءِ ھمراہ اَت وھد ، ماہ ءُ سال گْوزان اِت اَنت کس پہ کس ءَ سرپد نہ اَت ناھار ءُ ھپتاراں جیڑ اِت کہ ما ھر رند ءَ بے سوب بوتگ اِیں بلے اے رندی سوب مند بَہ اِیں اے رندی واجل ءُ سنگتاں الم پروش دئیں ناھار ءُ ھپتاراں وتی مِشن ءِ تیاری کُرت ءُ رھادگ بوتاں ءُ جنگ تاں بازیں روچ ءَ جاری اَت ، ھّداوند ءِ رھمتانی جمبراں ھور ءُ ھار کُت ءُ واجل گوں سنگتاں پد ءَ سوب مند بوت ءُ دُژمن ءَ پد ءَ وتی شکست ءُ پُروش کبول کُت۔
لھتیں ماہ ءَ پد واجل پہ یک کارے ءَ دْرانڈیھ ءَ شُت ءُ وتی زمہ واری وتی براس ءُ سنگتانی کُوپگاں دات اَنت ءُ اے ھم گْوشت کہ مئے مُلک ءُ ڈگارانی تہ ءَ ھچ وڑیں کمی مئیت ، بلکیں من ءَ چہ گیشتر شُمارا جُھد ءُ کُوشْش کنگی اِنت ، گوں ھمے پنتاں ھوار واجل درکپت ءُ دْرانڈیھ ءَ شُت ھپتگے نہ گوست کہ ناھار ءُ ھپتاراں مُلک ءُ ڈگار وتی ارجان کُت اَنت ، دِھکان ءُ سنگتاں مُدام تیرگواری کُت ءُ تیرانی آماچ نازاکیں بازار ءِ مردم ات اَنت برے زال ءُ برے پیر ءُ کماشے تیرانی آماچ بوت بازار ءِ مردُم پھک دلگران ات اَنت ءُ دھکان ءَ اے تجربہ نیستگ اَت کہ مئے دوست ءُ مئے دُژمن کُجام اَنت آ واجل ات کہ زانتکاریں مردمے ات انچو کہ وھد ءُ سال گوزان اِت اَنت دھکان ءُ آئی ءِ سنگتاں لھتیں بازار ءِ بے گناہ آؤرت کہ شُما اے ناھار ءُ ھپتارانی کمک ءَ کنگ ءَ اِت کہ مئے ملک ءُ ڈگارانی سر ءَ ناشر کاری بہ کن اَنت ، بلے ما ھچبر اے وڑ نیل اِیں اگاں اے ملک ءُ ڈگار آباد بِہ بَہ اَنت ایوک ءَ مئے نہ اَنت، بلکیں شُمئے زھگ ءُ نواسگ ھم چہ اے وشّیاں سیراپ بَہ اَنت اے وار ءُ بزگاں بازیں کوکار ءُ سلواتے کُت کہ ما بزگ ءُ بے گناه اِیں بلے دھکان ءُ آئی ءِ سنگتاں ایشاناں لٹّ ءُ کُٹّ کُت بازینے ءَ لٹ ءُ کُٹ برداشت نہ کُت اَنت ءُ ھما جاہ ءَ ساہ دات ءُ بیران بوت اَنت وھد ءِ ھمراھی ءَ دگہ بازیں دھکان ءُ شریکّے ءَ ھمے ملک ءُ ڈگارانی سر ءَ دُزّی بِنا کُت ءُ ھر یکُے، یکّے ءِ پاداں چیکّگ ءَ ات ءُ برے برے دھکان ءَ دپ جنگی کُت کہ شُما پلاں کار ءَ نہ کن اِت، گُڑا کُل وت ماں وت ءَ جیگ ما جیگ اَت اَنت۔
بلے! چرے بے اِیمانیں شریکّاں لھتیں دِھکان ءُ شریکّ وتی کار ءَ اِیماندار اَت ءُ ناھار ءُ ھپتارانی سر ءَ شرّیں وڑے ءَ اُرش کُت وھدے شرّیں اُرشے بوت گُڑا کُلاں ھمے اُرش پہ وت لیک اِت
چی ءَ کہ لھتیں نزانتکار ءُ سِلُیں مردُم اے ملک ءُ ڈگارانی سر ءَ پہ زُور مُشگ بوتگ اَت ءُ لھتیں گیرت مندیں دِھکان پہ ناھار ءُ ھپتارا نی جَنَگ ءَ پِدا اَت کہ ما ناھار ءُ ھپتاراں سرین پروش کن اِیں اگاں مئے ساہ بروت ھِچ پرواہ نیست، بلے ما پدکِنِز نہ بَہ اِیں چی ءَ کہ مئے بازیں سنگتاں ھمے راہ پہ وت گچین کُرتگ ءُ آ آشنا اِت اَنت کہ ما مِر اِیں بلے مئے ڈگاراں پد ءَ درآمد نیا اَنت ءُ وتی دست ءَ مان نہ دے اَنت وھد دیم ءَ جُنزان اَت ناھار ءُ ھپتار سرین پروش اِت اَنت ناھار ءُ ھپتاراں جیڑ اَت کہ اے مئے پدریچ ءَ ھتم کن اَنت گُڑا ناھار ءُ ھپتارانی گل ءِ سروکے ءَ یک ناھارے راہ دات ءُ دِھکان ءُ شریکّانی سروک ءِ سر ءَ اُرش کُت ءُ واجل ءِ دوستیں سنگت شھید کنگ بوت، بلے دھکان ءُ شریکّاں وتی کار گوں تْرندے ءَ دیم ءَ آؤرت چوش کہ چرے دھکان ءُ شریکّاں لھتے جھد ءَ گوں ناسمائی ھور کُتگ اَت پمیشکا ھمے گِر ءُ چیل ءَ دزگٹّ اَت اَنت کہ باریں بازار ءِ مردم ءَ مارا چے گْوش اَنت اگاں ما پدکِنز بِہ بَہ اِیں پرے ھاتِر ءَ چہ اے کار ءَ لھتے دست کش بوت ءُ لھتیں اُوشت ءِ آماچ بوت، ءُ لھتین ءَ وتی کِشک مٹّ کُت بلے منزل مٹ نہ کُت۔
ھمے دمان ءَ منی دیم ءَ گْوش ئے واجل یک کِسّھے وانگ ءَ اَت ءُ من ھمے کِسّہ ءَ آشنا بوت آں واجل ءَ گْوشت کہ شُما سُلُور ءُ مور دیستگ اَنت کہ یکشل ءَ روگ ءَ اَنت ، یکے یکے اگاں دور ءُ گِستا اِنت بلے گیشتر یک رِد ءَ اَنت اگاں آئی ءِ دیم ءَ دست یا لنکُکے بِہ دے آ وتی کِشک ءَ مٹّ کنت، بلے منزل ءَ ناں وھدے مور ءُ سُلُور ءَ کس داشت نہ کنت بیدے کُشگ ءَ گُڑا مردم ءَ کَے داشت کنت۔
وھدیکہ من اے کار بنا کُت گُڑا مردماں من ءَ وڑ وڑیں ھبر گْوشت بلے من وتی دل ءَ ستک اِت آں کہ من وتی منزل ءَ الم سر بہ آں اے راستے من باز رند ءَ وتی کِشک مٹّ کُتگ بلے منزل ناں مردم تئی دیم ءَ دِیوال بند اَنت ڈنگر دے اَنت ءُ کُنٹگ ریچ اَنت دانکہ تو پہ جُنزگ ءَ مھتل بِہ بَہ ئے ، بلے تو روان کن ءُ اِیشانی گپّاں گوش مدار چی ءَ کہ اے ھمے مردُم اَنت زِی ترا چے گْوشتگ اِش ، چنت براں تئی راہ اِش بستگ ، بلے باندا تو کہ سوبین بَہ ئے ھمے مردم تئی واستا چاپ جن انت ءُ تئی سِپت ءُ ستا کن اَنت۔
من زان آں اے ڈگارانی وشّی ءَ من نہ گند آں ، بلے منی آیوکیں پدریچ اِیشانی شیرکِنیں براں پہ شات ءُ گلے وارت واجل ءَ گْوشت میرو ھستگ ءَ یک بادشاھے کہ پہ شکار ءِ ھاتِر ءَ کوہ جنگلاں شُت راہ ءِ سر ءَ یک پیرمردے دیست کہ مچّے کِشگ ءَ اِنت کماش گوں وتی کار ءَ دلگوش اَت کہ بادشاہ ءَ درّائینت واجہ تو اے مچّ ءَ کِشگ ءَ ئے ، تو چو زان ئے کہ اے چُنت وھد ءَ پد بر دنت؟ پیر مرد ءَ بادشاہ پسّو دات ءُ گْوشت: من زان آں اے چو زُوت ءَ زُوت بر نہ کنت ءُ ناہ نہ دنت گُڑا بادشاہ ءَ پد ءَ گْوشت تو نوں پیر ءُ آجز اِنت ، تو داں اے مچّ ءِ ناہ ورگ ءِ وھد ءَ زندگ بَہ ئے؟ پیر مرد ءَ گْوشت: من راستے مرچی باندات ءِ سر ءَ آں ، گُڑا بادشاہ ءَ گْوشت تو پرچا اے مچّ ءَ کِشگ ءَ ئے؟ پیرمرد ءَ پہ شاکارگے درّائینت من اے مچّ ءَ پہ آیوکیں پدریچ ءِ واستا کِشگ ءَ آں ، چی ءَ کہ چہ ما پیسر اے دُگنیا ءَ دِگہ باز مردُم بوتگ کہ کِشتگ آیاں بر ما وارتگ مرچی من کِشگ ءَ آں برورد ءَ آیوکیں پدریچ وارت ، گوں اے گپّانی ھلاسی ءَ بادشاہ ءَ پُشت ماندات ءُ وتی گِس ءَ شُت لھتیں سال ءَ پد پیرمرد ءَ اے کوڑھیں دُگنیا یلہ کُتگ اَت ءُ یکروچے بادشاہ چہ ھمے راہ ءَ رَوَگ ءَ اَت اناگت ءَ بادشاہ ءِ چم مچّ ءَ کپت اَنت کہ مچّ بر اِنت ، گُڑا بادشاہ ھما دمان ءَ پیرمرد ءِ یاتاں کپت ءُ وتی کاردار ءَ را گّوشت مرچی ءَ پد اے مچّ ءَ آپ ءُ کدیم بہ کن ئے واجل ءَ گْوشت منی بچّ! تو نوں سرپد بوت ئے باید اِنت کہ سرپد ھم بِہ بَہ ئے ، من وَ پیسر ءَ سرپد آں بلے گپّے ءَ واجل تو سرپدے؟ ھمائیں تو کہ رپتگ ئے اے دِھکان ءُ آ دھکان ، اے شریکّ ءُ آ شریکّ وت ما وتاں جیگ ما جیگ بوتگ اَنت تو منی پاد ءَ بِچیلّ کن من تئی ، لھتیں دِھکان ءُ شریکّاں وتی جند شموشتگ دماگی ءُ جسمانی نادْراھی ءِ آماچ اِنت ءُ لھتیں نابزانتی ءُ بے سمائی ءِ شکار اِنت تو اگاں اِد ءَ بوتین ئے بلکیں تو نادْرھانی اِلاج کُرتگ اَت پمیشکا من اے کاگد ءِ سر ءَ وتی مارشتاں نبشتہ کنگ ءَ آں دانکہ تو سھیگ ءُ سرپد بِہ بَہ ئے من اے کاگد ءَ پہ تو گوات ءَ دَیَگ ءَ آں بلکیں تئی گْور ءَ سر بِہ بیت من زان آں اے سَے سال ءِ کِسّھے ءُ لبز سک آورت ءُ کسان نبشتگ اَنت، بلے من سدکاں کہ تو اے نِمدی ءَ گوں وتی چشمک ءَ پہ تبے وان ئے پد ءَ پہ گیگ ءُ گْور یک آشوبی دانکاں چکاریں کاگدے پہ دُرستیں دِھکان ءُ شریکّاں روان دے پمیشکا من دل ءَ سِتک ءُ یکین آں تاں واجل جان ھست ءُ ھیات اِنت ، مئے مُلک ءُ ڈگاراں کس چمشانکے دات نہ کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔