بلوچستان ءَ زالبولانی سر ءَ اُرش دیمروئی ءِ دیمپان اِنت

اود ءَ زالبول زانت ءُ زانگ ءِ جھد ءَ اَنت آیانی واستا مزنیں پھریزی ءِ گندگ ءَ کیت بلے چوشیں بازیں ڈیھاں زالبول چاگرد ءُ دگہ تکانی زوراں ڈن ءَ درکپت نہ کن اَنت –

ھمے تکانی تہ ءَ بلوچستان ءَ جنزوکیں زالبولانی کرد روچ پہ روچ دیم ءَ روگ ءَ گندگ ءَ آیگ ءَ اِنت بلے آیانی تکاں ھرچ ھساب ءَ یک ناں یک وڑے ءَ آیانی دیم ءَ اڑانکے مِک بیت ءُ آیانی روکیں چراگ ءِ کُشگ ءَ دست دراجی کنت –

ھمے وڑ مروچی بلوچستان ءِ دمگ مستونگ ءَ یک تیرگواری ءَ چار زالبول زدگ بیتگ اَنت – زدگ بیتگیں زالبول اسکول ءِ ٹیچر گوشگ بیتگ اَنت –

ھالانی تہ ءَ گوشگ بیتگ زالبولیں ٹیچرانی سر ءَ ھما وھد ءَ اُرش بیتگ آ دشت بابا اسکول ءَ ڈیوٹی ءَ واتر روگ ءَ بیتگ اَنت کہ مستونگ پڑنگ آباد ءَ ناشناسیں سلاہ بندیں مردماں آیانی وین ءِ سر ءَ اُرش کرتگ ءُ ھرچاریں ٹچریں زالبول زدگ بیتگ اَنت –

ھمے وئیل ءِ پژدر ءَ چاگردی رسانکجاھاں ترندی ءَ بلوچ پھناتاں ایر جنگ بیگ ءُ گوشگ بیگ ءَ اِنت کہ زالبولانی سر ءَ زالبولانی دیمروئی ءِ اڑانک اِنت –

ھمے درچ ءَ بلوچ اسٹوڈنٹس ایکشن کمیٹی ءِ سروک ڈاکٹر صبیحہ ءَ ٹوئٹر ءَ نبشتگ کرتگ ءُ گوشتگ کہ مستونگ ءَ چاریں زالبولانی سر ءَ اُرش پدردی اِنت –

آئی ءَ گوشتگ کہ چریشی ءَ پیسر ھم ھمے وانگ جاہ ءَ بیھاری دیگ بیتگ انت بلے بلوچستان ءِ چراگانی کُشگ ءَ ھرکسی دست دراج اَنت پرے ھاتر ءَ کس چوشیں چیزانی سر ءَ گامگیج نہ زور ایت –

ھمے درگت ءَ بلوچستان ءِ پیسریگیں سروزیر اسلم رئیسانی ءَ نبشتگ کرتگ ءُ مستونگ ءَ زالبولانی سر ءَ بیتگیں اُرش ایر جتگ ءُ گوشتگ کہ ناشرکارانی دست گُڈگ بہ بنت ءُ پُر ایمنیں زانت ءُ زانش ءِ جاورھالانی ناگیگ کنگ اِنت ءُ چوشیں مردم ترندیں سزا دیگ بہ بنت –

بلوچستان ءَ بازیں زالبول ھمے رنگ ءَ اُرش کنگ ءُ کُشگ بیتگ اَنت کہ بلوچ سیاسی تکاں بلوچ زالبولانی سر ءَ اُرش سرکار ءِ چیردستی ءَ برجاہ داشتگیں ڈیتھ اسکواڈ ءِ سر ءَ لڈگ بیتگ اَنت –

اگاں بلوچستان ءَ بلوچ زالبولانی سر ءَ اُرش دارگ نہ بیت اَنت ءُ بلوچ زالبولانی سر ءَ ھمے وڑ ءَ اُرش برجاہ بیت اَنت گڑا بلوچستان ءِ زالبول یکدم پشت ءَ کپ اَنت –