نبشتانک: شھید آفتاب ءِ یات ءَ
نبشتہ کار: بے نام بلوچ
دی بلوچستان پوسٹ
یک روچے کہ من دیم پہ وتی یک دوستیں سنگتے ءِ دیدار ءَ تربت ءِ واستوئی ءِ بازار ءَ روگ ءَ اِت اِنت گُڑا من دیست کہ یک نوجوانے چہ بازار ءَ ما واستوئی بازار ءِ نیمگ ءَ روگ ءَ اِنت من وتی پَرپٹ داشت ءُ نوجوان سوار کُت ءُ منزل ءَ سر کُت گُڑا وھدیکہ من آ وش کُت ءُ موکل لوٹ اِت گُڑا آئی ءَ من ءَ ہیرانی ءِ نگاھاں چاران ءَ گُشت “اد ءَ ہزار پرپٹ ءُ گاڑی گوست بلے منی ہاترا کسّ ءَ نداشت تو بگُش تو چَہ کُجا اتکگ ئے !” گُڑا من بچکندگ ءِ جَت ءُ گُشت ” شر وش اِنت گُڑا کہ منی کار باز اَنت”-
وھدیکہ من سرپد بوتاں کہ تو وتی سُھریں ھوناں گوں گُلزمین ءِ سینگار اتگ گُڑا من ءَ ھمے بُرزے کِسّہ یاد اَتک بوت کَنت من لوٹ اتگ اَت کہ ھما مرد ءَ بگُوش آں کہ من ءُ تو یک زبان ءُ یک پوشاک اِنت من ترا پجّا کاراں، تو بلوچے ئِے من جیڑاں اگاں من ءَ مرد ءَ جُست بکُت ایں کہ تو اے گپ ءُ ھبر چَہ کُجا دربُرتگ اَنت گُڑا من چی گُشتگ اَت؟ من چہ تو باز دربُرتگ بلے درُستاں چَہ شوکترین درونت کہ من چہ تو دربرُتگ آ ھر بلوچ ءَ پجّارگ ءِ درونت اِنت۔
منی ءُ تئی اولی رند ءَ دیدار ما وٹسپ ءَ منی داکلہ ءِ بابت ءَ بوتگ اَت من ءَ انگت یاد اِنت کہ تو گُشتگ اَت وتی ڈاکیومنٹس ءَ دیم بدے من تئی داکلہ ءَ کنائیناں گُڑا وھدیکہ من زرّ ءِ نام گِپت گُڑا تو گُشت کہ زرّ ءِ ہبر اِنچُک نہ اِنت، اگا تئی گور ءَ زرّ نیست ھچ مسلہ نہ اِنت آ شپ ءَ من تاں دیراں واب نہ کپتاں ءُ گوں ھمے جیڑگاں کہ اے وڑ چوں بوت کَنت؟ آ درامدے من ءَ نہ زانت، ما ھچبر دُچار نہ کپتگ اِنت بلے انگت من ءَ گُش ایت اگاں زرّ نیست گُڑا اے اِنچُکیں ھبرے نہ اِنت –
بلے وھدیکہ من تئی دیوان نِشتاں گُڑا من مار اِت کہ تو من ءَ زانتگ، تو من ءَ پجّاہ آؤرتگ پرچہ کہ من بلوچے آں ءُ تو ھر بلوچ زانتگ ءُ ھر بلوچ ءِ واستا جُھد ءَ بوتگ ئے – تئی مرگ مار ءَ ھچ درد نہ اِنت پرچہ کہ تو باز وتی وڑیں زانتکار ءُ رژناہ ھیالیں مردم پیداک کُتگ اَنت –
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔