ھزدار ءُ کلات ءَ سَے ورنا پاکستانی پوج ءِ دست ءَ بیگواہ

بلوچستان ءِ دمگ ھزدار ءُ کلات ءَ سَے ورنا پاکستانی پوج ءَ دزگیر کنگ ءَ پد ناشناسیں زنداناں برتگ اَنت ءُ چریشی ءَ پد آیانی ھچ ھال نیست –

ھزدار ءِ دمگ زھری ءَ سیادی داروکیں سئیں ورنا گوستگیں روچ ءَ پوج ءَ بیگواہ کرتگ اَنت – دمگی مردماں ٹی بی پی ءَ گوں گوشتگ یاسر ایوب ء مھمد ایوب زھری ءِ دمگ تلاوان ءَ گوستگیں روچ ءَ پاکستانی پوج ءَ یک لوگے ءِ سر ءَ بیڑ برتگ ءُ آوار جتگ –

پوج ءَ لوگ ءَ جاڑیگیں زالبول ءُ دگہ مردم لَٹ ءُ کُٹ کرتگ اَنت ءُ لوگ ءِ سامان پرشت ءُ پروش کرتگ اَنت –

ھمے رنگ ءَ زھری ءِ جھمنندیں دو ورنا بھادر ھان ء ھیدر ھان ءُ غلام قادر ء حضور بکش چہ کلات ءَ زھری ءِ نیمگ ءَ روگ ءَ بیتگ اَنت کپوتو ءِ ھند ءَ سی ٹی ڈی ءِ کارمنداں تیرگواری کرتگ ءُ ٹپیگیں جاوراں دزگیر کرتگ ءُ ناشناسیں جاھاں برتگ اَنت –

سی ٹی ڈی ءَ ٹاہ داتگ کہ گپتگیں مردم سلاہ بند بیتگ اَنت ءُ تیرگواری ءِ میان ءَ دزگیر کرتگ اَنت ءُ دمگی مردمانی رد ءَ گپتگیں مردم دست ءُ گوش بیتگ اَنت کہ کارمنداں دیستگ اَنت وسر ءَ تیرگوار ءِ نشانگ اش کرتگ اَنت ئِے –

زانگ بہ بیت ھمے سال ءِ مارچ ءِ ماہ ءَ سی ٹی ڈی ءَ ٹاہ داتگ کہ مستونگ ءَ بیتگیں یک جنگ ءُ چوپے ءِ میان ءَ بلوچ سلاہ بندیں گلانی پنچ باسک کُشگ بیتگ اَنت ءُ چریشی ءَ پد کُشگ بیتگیں مردمانی کھولاں سی ٹی ڈی ءِ گپ رد کرتگ ءُ گوشتگ کہ اے مردم پیسر ءَ دزگیر کنگ ءُ بیگواہ کنگ بیتگ اَنت –

سی ٹی ڈی ءِ نیمگ ءَ بلوچستان ءِ بنجاھی شھر شال ءَ ھوار دگہ دمگاں دروگیں دیم پہ دیمی جنگ ءُ چوپانی ھال بیتگ اَنت -انسانی ھکانی گل ءُ بلوچستان ءَ سیاسی گلانی نیمگ ءَ سی ٹی ڈی ءِ دروگیں دیم پہ دیمی جنگ ءَ جنگ بیتگیں کشت ءُ کوشاں آمیدگسی پَٹ ءُ پول ءِ لوٹ کنگ ءِ پرمان کنگ بیتگ اَنت –