اھوالکار عابد میر ءِ کستریں برات چہ شال ءَ بیگواہ

سر بیتگیں ھالانی رد ءَ بلوچستان ءِ بنجاھی شھر شال ءَ ساجد نامیں ورنایے ناگتی بیگواہ بیتگ-

فیس بک ءَ یک ھالے ءِ رد ءَ چہ بلوچستان ءَ سیادی داروکیں اھوالکار عابد میر ءَ گوشتگ کہ گوستگیں روچ ءَ منی برات ءِ ھچ ھال نیست آ لوگ ءَ در اتکگ واتر پد ءَ نیتکگ –

عابد میر ءِ رد ءَ آئی ءِ برات ساجد شال ءَ پی پی ایچ آئی پشتون باغ یونٹ ءَ لیبارٹری اسسٹنٹ ءَ کار کنگ ءَ اِنت – بیگاہ ءِ وھد ءَ آ درزی گری ھم کنت ئِے، گوستگیں بیگاہ ءَ آ لوگ ءَ دراتکگ پد ءَ ھما اِنت کہ بیگواہ اِنت، لوگ ءَ آئی ءِ گُڈی ھال کزائیں بیگاہ ءِ ساھت ھپت ءَ بیتگ – چریشی ءَ پد ھچ کس ءَ آئی ءِ ھال نہ بیتگ –

دومی برات خالد میر ءَ نبشتگ کرتگ کہ آئی ءِ برات چُوش اناگتی وسر ءَ بیگواھی ءِ گمان نہ بیگ اِنت بلے ما پولیس ءِ گور ءَ ارزی نبشتگ کنائین ئِے –

زانگ بہ بیت بلوچستان ءَ ھمک روچ زورانسری بیگواھیانی ھال پیداک اَنت – زورانسری بیگواھیانی بھتاماں گیشتر پاکستانی پوج ءُ چیریں ادارھاں جنگ ءَ اَنت – بلے اھوالکار عابد میر ءِ برات ءِ بیگواھی ءِ سبب زانگ نہ بیتگ اَنت –

ھمے وڑ ءَ گوادر ءَ پولیس ءِ دست ءَ نیکراھی رھشون ءِ دزگیری ءِ ھلاپ ءَ زھرشانی –

بلوچستان ءِ تیابدپی شھر گوادر ءَ گوستگیں روچ ءَ پولیس ءِ نیمگ ءَ نیکراھی رھشون سعید احمد بلوچ ءِ لوگ ءَ بیڑی ءِ وھد ءَ آئی ءِ دزگیری ءِ ھلاپ ءَ شال، تربت، ھرنائی ءَ ھوار دگہ جاھاں زھرشانی دارگ بیتگ اَنت –

گیشیں ھالانی رد ءَ بلوچستان ءِ بنجاھی شھر شال ءَ جماعت اسلامی ءِ دزبندی ءَ گوادر ءَ جماعت اسلامی ءِ رھشون ءِ دزگیری ءُ دودمانانی لگتمال کنگ ءِ ھلاپ ءَ شال ءِ پریس کلب ءِ دیم ءَ زھرشانء کنگ بیتگ –

زھرشانی کنوکانی دستاں بینرز ءُ پلے کارڈز ءُ گوادر ءِ انتزامیہ ءِ ھلاپ ءَ اوگام جنگ بیتگ اَنت –

ھمے وڑ ءَ بلوچستان ءِ دمگ ھرنائی ءِ پریس کلب ءِ دیم ءَ زھرشانی کنگ بیتگ -زھرشانء کنوکاں تران کنان ءَ گوشتگ کہ جماعت اسلامی ءِ رھشونانی لوگاں دور کنگ ءُ دودمانانی پادمال کنگ ءَ سعید بلوچ ءِ دزگیری ءَ ایر جن ایں –

آیاں گوشتگ کہ پولیس انتزامیہ ءِ اے کارپداں دودمان پھریزگی بیگ ءَ نہ اَنت ءُ چوشیں کارپدانی پشدر ءَ پولیس ءِ واک کشگ بہ بنت –

ھمے رنگ ءَ بلوچستان ءِ دمگ کیچ ءِ بنجاھی شھر تربت ءَ سربیتگیں ھالانی رد ءَ آل پارٹیز کیچ ءِ دزبندی ءَ گوادر ءِ وئیل ءِ ھلاپ ءَ پریس کلب ءِ دیم ءَ زھرشانی کنگ بیتگ، ھمے وھد ءَ آل پارٹیز کیچ ءَ سعید بلوچ ءِ وسریں دزگیری ءُ لوگ ءِ دودانی لگتمال کنگ ایر جتگ ءُ گوشتگ کہ اے ھچ رنگ ءَ اوپاری نہ اِنت –

آیاں گوشت کہ بنیاتی آسراتیاں گوادر ءِ مھلوک زبھر اَنت وھدیکہ آ وتی ھک ءِ واستا توار چِست کن اَنت گڑا آ دزگیر کنگ ءُ جیلانی تہ ءَ بند کنگ بنت ئِے –

زانگ بہ بیت گوستگیں روچ ءَ سعید احمد بلوچ ایکسین کیسکو گوادر ءِ گوادر ءِ یک کارندھے ءِ سر ءَ لَٹ ءُ کُٹ ءَ بھتامی ارزی نبشتگ بیتگ اَت چریشی ءَ دمگ ءِ پولیس ءَ ارزی ءِ بنیات ءَ آ دزگیر کرتگ، چریشی ءَ پد آل پارٹیز گوادر ءَ زھرشانی کرتگ ءُ دگ بند کرتگ پد ءَ آ یلہ کنگ بیتگ –