بلوچستان: سوراب ءَ دگ ءِ وئیلے ءَ سَے زالبول بیران

سر بیتگیں ھالانی رد ءَ بلوچستان ءِ دمگ سوراب ءَ دگ ءِ وئیلے ءَ سَے زالبول بیران ءُ چار کس زدگ بیتگ اَنت-

وئیل سوراب ءَ مزن شھدگ ءِ سر ءَ لاگھوریان ءَ دیم ءَ اتکگ کہ اود ءَ گاڑی ڈرائیور ءِ دست ءَ لگوشتگ ءُ چَپ بیتگ چریشی ءَ سَے زالبول ھما جاہ ءَ بیران بیتگ اَنت –

گاڑی شال ءَ دیم پہ کراچی ءَ روگ ءَ بیتگ لاگھوریان ءَ گاڑی ءِ ٹائر ترک اِتگ ءُ چریشی ءَ یکیں کھول ءِ سَے زالبول بیران ءُ سَے چکاں ھوار چار مردم زدگ بیتگ اَنت –

زدگ ءُ بیران بیتگیں مردم ریسکیو ءَ سوراب ءِ نادراہ جاہ ءَ سر کرتگ اَنت ءُ اود ءَ بنداتی ٹپانی درمان ءَ پد شال ءَ برگ بیتگ اَنت –

بیران بیتگیں مردمانی جون لیویز ءَ کھول ءِ گور ءَ رسینتگ اَنت ءُ گیشیں پَٹ ءُ پول لیویز کنگ اِنت –

بلوچستان ءَ ھمک روچ بازیں ھسابے ءَ دگانی وئیلاں لس مھلوک مرگ ءِ دیمپان اَنت ءُ مھلوک ءِ گوشگ اِنت ڈرائیورانی بے دلگوشی ءَ گیشتریں وئیل دیم ءَ آیگ ءَ اَنت –