نبشتانک: راجدپتر ءُ سرمستانی ٹک
نبشتہ کار : ساچان آسکانی
دی بلوچستان پوسٹ
اگاں ما بلوچ راجدپتر ءَ ھُورت چاری بہ کنیں ءُ بہ چاریں آئی ءِ تہ ءَ بلوچ ٹَک ءُ بولکانی یک لَڑے مئے دیم ءَ کیت ھمے وڑ ءَ بلوچ راجدپتر کوھن انت ھمے پیم ٹک ءُ کبیلہ کوھن انت اچ ھمے کوھنیں ٹکاں یکے سرمستانی انت سرمستانی اشی ءِ مانا ءُ گْوستانک چی انت؟ لبز ء سرمستانی چہ سرمست ءَ درتکگیں لبزے ایشی ءِ مانا مھکم ءُ توانائیں سر ، زانتکار ، چیزانی کدر کنوک، چیزانی شوک داروک ، ءُ بھادر انت ۔
سرمست ءِ پدریچ ءَ سرمستانی گش انت سرمست ءِ پت مبارک ءِ پت صلاحی یک ھنر زانت ءُ تمردیں مردے بیتگ ۔سرمست مبارک وتی اِزم ءُ ھنر ءَ سک بلد ءُ بودناک بیتگ چی ءَ کہ سرمست مبارک ءَ اے ھنر چہ وتی پت مبارک ءُ پیرُک صلاحی ءَ چہ میراس ءَ رس اِتگ سرمست مبارک وتی کسب ءُ ھنر ءَ وتی بودشت ءُ زانشتانی جھلانکی ءَ ایشی ءِ تہ ءَ شرتری ءُ گھتری آران کنان کت انت ءُ پراہ ءُ شائگان کنان بوت ھمے بودشتانی سبب ءَ سرمست مبارک 1410ءَ امیر میرو ثانی ءِ دور ءَ مستریں سربراہ سلاہ جاہ جوڑ کنگ بوت اے زمہ داری 1410 ءَ بہ گر داں میر محراب خان ثانی ءِ دور ءَ 1817 بہ گر داں 1839 ءَ ھست ات اے زمانگ ءَ سرمست مبارک ءِ پدریچ ءَ چہ پد ءَ شاھی ءِ پت پولاد سگار اسلاہ جاہ ءِ سربراہ جوڑ بوت انت۔
پد ءَ امیر نصیر خان ثانی ءِ دور ءَ1841 تا 1857 ءَ راجکاری ءُ زرّی جاورانی سبب ءَ پوریات پوج دارگ بوت ءُ سلاہ جاہ فوجی سربراہ ءُ کماندار ءَ دیگ بوت انت ھژدھمی ایسوی سدی ءِ میان ءَ سرمستانی ٹک وتی دیمروی ءِ تہ ءَ زند ءَ گوازینگ ءَ بوتگ ۔اشی ءَ پد سرمستانی ٹک ءِ زوالی ، پدمنتگی ءُ در پہ دری ءِ دور تاں روچ ء مروچی گوزان انت بلے اے یک تھلیں راستی یے بلوچ ءِ چاگرد ءَ تاں روچ ء مروچی ھست انت اے گروہ بلوچ ءِ گوست ءُ انیگیں وھد ءَ یک بستارے ءِ واھند انت بلے بلوچ ءَ وتی درائیں دود ءُ روایات ولگوج ءُ پراموش کتگ انت ءُ پہ اے گروہ ءَ ناانساپی ءُ پدمنتگی ءِ یک درے بوتکگ کہ اے بلوچ چاگرد ءِ پدمنتگیاں مستریں پدمنتگی انت انگت برجاہ انت اگاں راجدپتر ءَ بوانیں ءُ بہ چاریں اے ٹک بلوچ ءِ ایندگہ ٹکانی وڑ ءَ بھادر ءُ وتی ھاک ءُ ھک ءَ یک مروکیں ٹکّے زانگ بیت ۔
وھدے انگریزاں کلات ءِ سر ءَ ارش کت 1839 ءَ امیر محراب خان ءِ ھمراھی ءَ یک سرمستانی یے اوں ھمے جنگ ءَ شھیدی ءِ جام ءَ نوش کنت بلے چہ وتی کولاں نہ بج اِیت ھمے جنگ ءَ میر محراب خان ءِ ھواری ءَ بازیں ٹکّانی مردم ھوار بنت ءُ شھید کنگ بنت ھمے شھید بیتگینانی سر ءَ پھر ءُ شان کن انت بلے سرمستانی ٹک ءَ ایر جن انت اگاں چہ اے جنگ ءِ تہ شر شریں سرداراں وتی پونز بُرتگ میر محراب خان اے جنگ ءَ درائیں سرداراں لوٹُک دنت پہ وتن ءِ رکینگ ءَ بلے پہ آیگ ءَ تیار نہ بنت ۔میاتکین انت انگت ھیر ات بلے انگریز ءِ مالی ءُ ورگی ءُ چرگی کمک ءَ اوں کہ کن انت راجدپتر گش اِیت میر محراب خان یک سردارے ءِ کر ءَ جنکیں چک ءَ روان دنت پہ کمک ءَ ھمے سردار ءَ جنکیں زھگ ءِ میار نہ گیپت ءُ کمک کنگ ءَ ساپ انکار کنت جنگ ءِ تہ ءَ شھید بیتگیں مردمانی نام چوناھا اے جنگ ءَ 400 بلوچ پہ وتن ءَ نمیران بنت بلے لھتیں زھم جن کماندار ءُ مزن نامیں ناماں نبشتہ کنگ لوٹاں ۔
میر محراب خان ، عبدالکریم رئیسانڈی ، سردار اسد خان رئیسانڈی ، سردار ولی محمد شاہی زئی مینگل ،میر تاج محمد شاہی زئی مینگل ، میر محمد علی شاہی زئی مینگل ، میر محمد فاضل لہڑی ، سردار محمد خان لہڑی، سردار زمان خان پندرانڈی، میر دادکریم چندوزئی شاہوانڈی،میر شہباز خان نیچاری ، خان محمد دیہوار ارباب شہرِ قلات، میر نبی بخش جتوئی علاقہِ نرمک قلات، میر قیصر خان بیزنجو،میر شاہ دوست بیزنجو،محمد رضا وزیر خیل ، نورمحمد شاہی ءِ پت پولات سرمستانی سلاہ جاہ ءِ سربراہ ،تاج محمد شاغاسی، بچامل ءِ دیوان مال ءِ وزیر ، کھیم چند ءِ دیوان ، آسرداس ءِ دیوان مکھی ہندو پنچائیت قلات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔