نبشتانک: تپنگی یا سرکار؟
نبشتہ کار: شاری بلوچ
دو سال پیسر آ وانگ ءَ اَت، سھب ءَ داں پیشیم اسکول ءَ ءُ بیگاھاں انگلش لینگویج سنٹر ءَ ونت ئِے، پیسر ءَ آئی ءِ ھمے مدیمی کار بوتگ بلے مروچاں وانگ ءَ نہ اِنت، نشتگ کار ءُ روزگار پہ وت ءَ پولگ ءَ اِنت۔ چو نہ اِنت کہ آئی ءَ وانگ یل داتگ، آ وَ انگت وانگ لوٹ اِیت بلے آئی ءَ را وانَگ ءِ جند یل داتگ اَت، آئی ءَ را وانَگ ءَ چونی ءَ یل داتگ بیا روئیں دو سال پُشت ءَ-
دو سال پیسر یک سھبے ءَ آ مدیمی ئیں رنگ ءَ آ گوں وتی کلاس پیلواں اسکول ءَ وتی کوٹی ءَ اَت، آ وھد ءَ انگلش ءِ پیرڈ اَت بلے اِے روچ ءَ انگلش سبجکٹ ءِ ماسٹر نہ یتکگ اَت (ماسٹرانی کار بوتگ یک روچے آتکگ ءُ دو روچ نہ یتکگ اَنت) آ وتی کوٹی ءَ گوں وتی سنگتاں دیوان ءَ ات کہ لھتے مردم اسکول ءَ ایشانی کلاس ءَ آتک انت، آھاناں گُشگ بوت کہ باندا شھدائے مُرگاپ ءِ ھاتر ءَ دیوانے بیت دراھیں اسکول ءِ بچک ءُ میتگ ءِ مردم بھر بہ زور اِت ءُ آھاں اے ھم گشگ بوت کہ چہ دری جاھاں ھم مردم پیداک اَنت پد ءَ پشیم بوت آ شُت وتی لوگ ءَ سنٹر اوں بند اَت-
شپ آتک، پد ءَ سھب بوت آ شت پہ اسکول ءَ، آئی ءَ دیست اسکول ءِ چپ ءُ راست ءَ، پُشت ءُ دیم ءَ، سربِر ءَ ءُ تہ ءَ سلاہ بندیں تپنگی ءُ دموکہ والا مردم ءَ چہ پُر اَت ءُ اسکول ءِ ھر نیمگ ءَ نوک رنگیں بیرک جنَگ بوتگ اَت، آئی ءَ جیڑ اِت زی آئی ءَ گُشگ بوتگ اَت کہ اسکول ءَ دیوانے بیت بلے مرچی اسکول یک کیمپے بوتگ اَت آ شُت اسکول ءِ تہ ءَ لھتے مردم نشتگ اَت آ ھمایانی کرّ ءَ نِشت، کم کم ءَ مردمانی آھگ اَت داں کہ پیشم ءَ اسکول چہ مردم ءَ پُر بوت آئی ءَ ھچ نہ زانت چے بوگ ءَ اَنت، نوکیں پلوے سمبھینگ بوت دیوان برجاہ بوت، لیڈرانی گُشتانک ءَ چے اسکول سر ءَ زُرتگ اَت، بلے آئی ءِ چم تھنا گوں کش ءُ کِرّ ءِ تپنگی مردماں سک ات اَنت آئی ءَ جیڑ اِت اے دیوان ءَ تپنگی چے ءَ آتکگ اَنت، دانکہ شپ بوت ءُ دیوان اوں ھلاس بوت ھرکس ودگ ودگ بوت آ اوں وتی لوگ ءَ شُت۔
شپ گْوست ءُ روچ بوت، بلے اِے روچ ءَ اسکول پچ نہ بوت۔ دومی روچ آتک ھم بلے اسکول پچ نہ بوت۔ سیمی ءُ چارمی روچ گوست داں ھپتگے بوتگ اَت اسکول بند اَت آ ھپتگے ءَ پد سرپد بوت ماسٹر چہ سرکار ءِ بیمّ ءَ اسکول ءَ نیاینت کہ آھانی اسکول ءَ پرچا چشیں دیوانے کنگ بوتگ ءُ دیر نہ گْوستگ اَت کہ اسکول ءَ پوج آتک ءُ نشت وتی دائمی بنجلے جوڑ کت ئِے کہ کس مئیت چشیں دیوان پد ءَ کنگ مہ بیت۔
انو اسکول ءَ دو سال گْوستگ کہ اسکول بند اِنت آ گوں وتی میتگ ءِ ھمسرواں بے زانتی زِند ءَ گْوازینان اِنت، برے برے آ کہ چہ اسکول ء کرّ ءَ گْوز اِیت گڑا آ جیڑ اِیت اسکول ءِ بند کنگ ءِ زمہ وار کَے اِنت، سرکار اِنت یا تپنگی؟۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔