بلوچستان ءَ جتا جتائیں وئیلاں ھپت مردم بیران، شش ٹپی دو جون دست کپتگ

سربوتگیں ھالانی رد ءَ بلوچستان ءِ دمگ ھزدار، چاگی، مستونگ، پنجگور، شال ءَ جتا جتائیں وئیلاں ھپت مردم بیران اَنت ءُ شش ٹپی بوتگ اَنت ، وھدیکہ اوستہ محمد، قلعہ عبداللہ دو جون دست کپتگ ءُ گڈانی ءَ یک ورنایے زر ءَ بُڈ اتگ –

گیشیں ھالانی رِد ءَ ھزدار ءِ دمگ لالھوریان ءَ دگ ءِ وئیل ءَ سَے مردم بیران بوتگ اَنت ءُ چار مردم ٹپی بوتگ اَنت – وئیل تیز رؤگ ءُ گاڑی ءِ ٹیر ترکگ ءِ سبب ءَ دیم ءَ اتکگ، چریشی ءَ سواریں ھپت مردم بیران ءُ ٹپی بوتگ انت – ٹپی بوتگیں مردم ٹیچنگ نادراہ جاہ ءَ سر کنگ بوتگ انت –

ھمے وڑ بلوچستان ءِ دمگ چاگی ءَ گاڑیاں آس لگگ ءِ سبب ءَ دو مردم سُتکگ ءُ بیران بوتگ اَنت ءُ دو ٹپی بوتگ اَنت-

ھالانی رِد ءَ چاگی ءِ دمگ یک مچ ءِ نزیک ءَ آر سی ڈی شاھدگ ءِ سر ءَ دو ایرانی پیک اپ گاڑیاں ڈیک وارتگ ڈیک ورگ ءِ سبب ءَ گاڑیاں آس لگ اتگ –
آس لگگ ءِ سبب ءَ گاڑیاں سواریں دو مردم بیران ءُ دو ٹپی بوتگ اَنت، ھمے گوشگ بوگ ءَ انت ھردو گاڑیاں پٹرول لوڈ بوتگ ءُ آس لگگ ءَ ھردو گاڑی ستکگ ءُ پُر بوتگ انت، ٹپی ءُ بیران بوتگیں مردم نادراہ جاہ ءَ سرکنگ بوتگ انت –

دومی نیمگ ءَ مستونگ ءَ ناشناسیں مردمانی تیرگواری ءَ یک مردمے بیران بوتگ –

ریسکو بنشون ءِ رِد ءَ مستونگ دگ ءِ سر ءَ قادری پمپ ءِ نزیک ءَ ناشناسیں مردماں سی سالی ئیں گل احمد ء میر احمد ءِ سر ءَ تیرگواری کتگ ءُ کشتگ ءُ تتکگ انت –

بیران بوتگیں مردم ءِ جون سول ھسپتال ءَ سرکنگ بوتگ اود ءَ اژدری چار ءُ ٹپاس ءَ پد کھول ءِ ھوالہ کنگ بوتگ –

ھمے وڑ پنجگور ءَ ناشناسیں مردمانی تیرگواری ءَ چُکے ءَ ھوار دو مردم ٹپی بوتگ اَنت –

پولیس ءِ رِد ءَ وئیل جامع مسیت ءِ نزیک ءَ دیم ءَ اتکگ کہ ناشناسیں مردماں تیرگواری کُتگ کہ چریشی ءِ آسر ءَ بالاچ ء نبی بکش، سپر خان ء سمیع اللہ جھمنند تسپ ٹپی بوتگ انت –

پولیس ءَ ٹپی بوتگیں مردم نادراہ جاہ ءَ سر کتگ انت –

دگہ وئیلے شال لکپاس ءَ دیم ءَ اتکگ کہ ایف سی ءِ کارمندانی تیرگواری ءَ الحکمت کوچ ءِ ڈرائیور بیران بوتگ –

ڈرائیور ءِ سر ءَ تیرگواری ءُ آئی ءِ کوش ءِ پشدر ءَ کراچی ٹرانسپوٹراں زھرشانی کتگ ءُ شھدگ بند کرتگ –

اوستہ محمد ءَ یک مردمے ءِ جون ءِ دست کپتگ –

سربوتگیں ھالانی رِد ءَ اوستہ محمد ءَ سٹی تانہ ءِ نزیک ءَ بیست ءُ ھشت سالی ئیں ورنایے دست بستگیں ءُ تیر سپتگیں جون ءِ دست کپتگ –

ورنا ءِ پجار بدرالدین کوسہ ءِ نام ءَ چہ بوتگ – ھمے گوشگ بوگ ءَ انت کہ مرد پون کنگ ءُ لوٹارینگ بوتگ، کہ گاڑی ءَ بہ زوریت بئیت کراچی ءَ رؤگی انت – وئیل درگت ءَ دنیگت ءَ گیشیں سرپدی سر نہ بوتگ اَنت کہ پیشی زاتی جیڑہ بوتگ یا ڈنگی ، گیشیں پٹ ءُ پول ءَ دمگی پولیس کنگ انت اژدری چار ءُ ٹپاس ءَ پد ورنا ءِ جون کھول ءِ ھوالہ کنگ بوتگ –

دگہ جون ءِ قلعہ عبداللہ ءَ دست کپتگ – ھالانی رِد ءَ قلعہ عبداللہ جنگل پیری علیزئی ءَ ناشناسیں مردمے ءِ جون دست کپتگ، لیویز ءَ مردے جون سول ھسپتال ءَ سرکتگ دنیگت ءَ آئی ءِ پجار نہ بوتگ –

دگہ وئیلے بلوچستان ءِ دمگ ھب ءَ دیم ءَ اتکگ کہ ورنایے زر ءَ بُڈ اتگ، ورنایے شوھاز برجاہ انت –

ایدھی بنشون ءِ رِد ءَ گڈانی زر ءَ سیل ءُ سواد ءَ اتکگیں ھژدہ سالی ئیں ورنا حسن کوہ ءِ سر ءَ چہ زِر ءِ تہ ءَ کپتگ ءُ بڈ اتگ – ورناہ کراچی ءِ جھمنند انت –