شال ءَ بیگواھیں مردمانی ھاتر ءَ زھرشانی برجاہ

ائید ءِ روچ وشی ءُ بچکنداں گوں وت زور ایت ایر رؤت، ھمود ءَ کہ ھما راج کہ ایردستی ءِ زمزیلاں گوں بندوک انت آھانی ھاتر ءَ ائید ءِ وشی پہ دردیگ انت – ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ یانزدہ روچ سرجم بوتگ – بلوچستان نیشنل پاٹی ءِ بنجاھی پتر ءِ باسک ءُ ایم این اے ہاشم نوتیزئی ءَ بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ – ھمے وھد ءَ آھانی گوشگ ات کہ ماما قدیر ءَ مئے گھار ءُ دگہ مردمانی ھمراھی ءَ بیگواھیں بلوچانی ھاتر ءَ شاھگانیں جھدے کتگ ما آئی ءِ جھدے ستاشانی ءَ کنیں –

ہاشم نوتیزئی ءَ دیمتر ءَ گوشت کہ دنیا ءِ تہ ءَ چشیں ھچ وڑیں کانودے نیست کہ ریاست وتی مردماں آوار بہ جنت ءُ بیگواہ بہ کنت ءُ بازیں سالاں پد آھاں یلا بہ کنت یا آھانی جون در بئیت – اے سک باز گرانتر ءُ گمزدگیں جاورھال انت –

آئی ءِ گوشگ ات کہ بلوچستان نیشنل پاٹی ءَ اولی روچ ءَ چہ بنجاھی اسمبلی ءِ تہ ءَ بیگواھیں مردمانی لڑ دیم ءَ آؤرتگ – ما گوشگ لوٹیں کہ ریاست سر ءَ ھوش بہ گپت اے وڑیں وئیلاں ایرجنی ریاست ءِ بگیری ءَ گیشتر بنت –

وائس فار بلوچ مسنگ پرسنز ءِ رھشون ماما قدیر بلوچ ءَ گُشگ ات کہ اے راستی ءِ کہ راج ءِ یک بھرے انگت واب انت ءُ یک بھرے بے شعوری ءَ پُرایمنیں جھد کنوکانی سر ءَ تنکید کنگ ءَ انت پرچا کہ اے مردم ھر امل ءَ وتی واھشتانی درچ ءَ چارگ لوٹ انت –

ماما قدیر ءِ گوشگ ات کہ ائید ءِ روچ وشی ءُ بچکنداں گوں وت زور ایت ایر رؤت، ھمود ءَ کہ ھما راج کہ ایردستی ءِ زمزیلاں گوں بندوک انت آھانی ھاتر ءَ ائید ءِ وشی پہ دردیگ انت – ائید ءِ بابرکتیں روچ ھم بیگواھیں بلوچانی بنجل پچ بیت ءُ اے روچ ءَ روانک ءُ زھرشانی بیت –

آئی ءِ گوشگ ات کہ بلوچستان راجدپترے گرانتریں جاورھالاں گوں دوچار انت، مردم وت ماں وت گلائیش انت، چیریں ادارہ ءُ پوج بلوچستان ءِ جاورھالانی ھرابی ءِ زمّہ وار انت –

دومی نیمگ ءَ متھدہ ارب امارات ءَ ءُ پاکستان ءَ بیگواھیں انسانی ھکانی باسک راشد حسین بلوچ ءِ کھول ءَ سینزدہ مئی پنچ شمبے روچ ءَ ھلیجی ڈیھاں ائید روچ ءَ آن لائن کمپئین جار پرینتگ –

کھول ءَ وتی جار ءِ تہ ءَ گوشتگ کہ ائید ءِ روچ ءَ متھدہ ارب امارات ءُ پاکستان ءِ نیمگ ءَ راشد حسین یل کنائینگے ھاتر ءَ #SaveRashidHussain ءِ ھیش ٹیگ کمپئین کنگ بیت اِنت –