دستونک: ائید ءِ نام ءَ
گلؔ بلوچ
دی بلوچستان پوسٹ
پیداک اِنت دیر ءَ ائید ءِ وشبو
من ءَ نہ لگ ایت تئی دید ءِ وشبو
سباہ ءِ کوشے بہ کش ایت بلکیں
بہ شنگ ایت شھر ءَ آ مید ءِ وشبو
چک ایت ھزار بر، آ دشت ءِ پلگد
پاھو کہ کار ایت ھمید ءِ وشبو
منی زمین ءَ ھوناں پل رودینت
پیداک اِنت ھاک ءَ شھید ءِ وشبو
بہ کن وت ءَ تو ھانی ءُ شیرین
بہ آں من پرھاد مرید ءِ وشبو
ھسین آں اھد ءِ منی اِے ڈیھ اِنت
نئیت اِنت ھچبر یزید ءِ وشبو
پدائیاں چہ ھمے من دربرت
بَدان ءَ پاک کنت، مجید ءِ وشبو
وتی من شھر ءَ سک دیراں گلؔ جان
من ءَ نہ ساچ ایت ائید ءِ وشبو