گوستگیں بیست ءُ چار ادارانی تہ ءَ بلوچستان ءَ چار بندیگیں مردم یل بیتگ اَنت

سر بیتگیں ھالانی رد ءَ بلوچستان ءِ جتا جتائیں ھنداں بیست ءُ چار ادارانی تہ ءَ چار بندیگیں مردم یل کنگ ءُ وتی لوگاں سر بیتگ اَنت –

یل بیتگیں مردمانی تہ ءَ یک سال ئِے ءُ شش ماہ ءَ پیسر شال ءِ دمگ سریاب ءَ بیگواہ بیتگیں میر اھمد بنگلزئی جھمنند اسپلینجی مستونگ یل کنگ بیتگ –

کیچ ءِ دمگ گورکوپ ءَ چار ستمبر دوھزار ءُ نوزدہ ءَ آوار جنگ بیتگیں عثمان مقبول ھم یل کنگ بیتگ ءُ وتی لوگ ءَ سر بیتگ –

دومی نیمگ ءَ بیگواھیں اعظو لانگانی مری مھمد پنام ءِ پٹو چھلگری مری گوستگیں روچ ءَ ھرنائی ءَ یل کنگ بیتگ ءُ وتی لوگاں سر بیتگ اَنت –

یل بیتگیں مردمانی یل بیگ بلوچستان ءَ گار ءُ بیگواھیں مردمانی واستا جھد کنوکیں گل وائس فار بلوچ مسنگ پرسنز ءَ راست کرتگ اَنت –

وائس فار بلوچ مسنگ پرسنز ءِ گوشگ اِنت بیگواھیں مردمانی یل وشی یے ءُ ما سرکار ءَ ھمے اُمیت ءَ دارایں کہ آؤکیں ائید ءِ وشی ءَ درستیں بیگواھیں مردماں یل دنت –

زانگ بہ بیت گوستگیں ھپتگ ءَ لھتے مردم یل بیتگ اَنت کہ آیانی تہ ءَ کمبرانی برادری ھم ھوار اَنت، بیگواھیں مردمانی کھول یل بیتگیں مردمانی یل بیگ ءَ وشی درشانگ ءَ اَنت ءُ وتی مردمانی ودار ءَ چم اش راھیگ اَنت –