سال دو ھزار ءُ پانزدہ ءَ بیگواہ بیتگیں پنجگور ءِ جھمنند یل بیتگ

سر بیتگیں ھالانی رد ءَ بلوچستان ءِ بنجاھی شھر شال ءَ بیست ءُ پنچ فروری دوھزار ءُ پانزدہ ءَ پاکستانی پوج ءُ چیریں ادارھانی دست ءَ آوار جنگ بیتگیں غلام جان جھمنند تسپ پنجگور یل کنگ بیتگ –

غلام جان ءِ یل بیگ ءِ ھال بلوچستان ءَ گار ءُ بیگواھیں مردمانی واستا جد ءُ جھد کنوکیں گل وائس فار بلوچ مسنگ پرسنز ءَ راست کرتگ ءُ گوشتگ کہ غلام جان جھمنند تسپ پنجگور یل بیتگ ءُ وتی لوگ ءَ سر بیتگ –

اشی ءَ بہ وان اِت گوستگیں روچ ءَ شال ءَ بیگواھیں مردمانی زھرشانی

بلوچستان ءَ گار ءُ بیگواھی ءِ درچ گوستگیں بازیں وھداں برجاہ اَنت ءُ دومی نیمگ ءَ شال ءُ کراچی ءَ بیگواھیں مردمانی شوھازگ ءَ وائس فار بلوچ مسنگ پرسنز ءُ بیگواھیں مردمانی کھول یکشل ءَ زھرشانی ءَ گندگ ءَ کاینت –

بلوچستان ءَ بندوکیں سیاسی پاٹی ءُ انسانی ھکانی گلانی گوشگ اِنت کہ بلوچستان ءَ اے وھد ءَ ھزارانی کچ ءَ بلوچ بیگواہ اَنت کہ آیانی تہ ءَ نودربرانی بازیں کَچے ھوار اِنت –

سیاسی ءُ انسانی ھکانی گلانی بھتام اِنت کہ بلوچستان ءَ گار ءُ بیگواھیاں ریاستی ادارہ دزمانجن اَنت –