شال ءَ بیگواھیں مردمانی ھاتر ءَ زھرشانی برجاہ

بلوچانی آوار جنی ءُ بیگواھی وئیل مشرف ءِ دور ءَ بندات بوتگ، ھما روچ ءَ بگر تاں روچ ء مروچی پنجاہ ھزار ءَ گیش بلوچ پاکستانی ایجنسیاں آوار جتگ ءُ بیگواہ کتگ انت – ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ یک روچ سرجم بوتگ – بلوچ نودربر گل اگدہ دار شکور بلوچ، ریاز بلوچ، باسد بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وی بی ایم پی ءِ رھشون ماما قدیر بلوچ ءِ گوشگ ات کہ بلوچستان جیڑہ ءِ سر ءَ بلوچ راج ءُ ورنایانی آوار جنی ءُ شھیدی ءَ پد زانگولیں جونانی کپگ ءِ درگت ءَ انسانی ھکانی گل میان استمانی ادارہ ءُ گل گپ جنگ ءَ لاچار بوتگ انت ءُ میان استمانی شاھزانتاں ھم نبشتہ کنگ بندات کتگ –

آئی ءَ گوشتگ کہ بلوچانی آوار جنی ءُ بیگواھی وئیل مشرف ءِ دور ءَ بندات بوتگ اَنت آئی ء پوج ءِ چیردستی ءَ انٹلی جنس ءَ ھم مھار بڈا داتگ ءُ یل کنگ بوتگ ءُ آھاں ٹاسک دیگ بوتگ کہ القائدہ ءُ تالبانانی نام ءِ سر ءَ بلوچ، پشتون ءُ سندی آوار جنگ ءُ بیگواہ کنگ بہ بنت ھما روچ ءَ بگر تاں روچ ء مروچی پنجاہ ھزار ءَ گیش بلوچ پاکستانی ایجنسیاں آوار جتگ ءُ بیگواہ کتگ انت –

آئی ءِ گوشگ ات کہ اے درگت ءَ وائس فار بلوچ مسنگ پرسنز ءَ یک رپورٹ ءِ جوڑ کتگ اَت کہ آ دھک ءَ ماورائے کانود دزگیری، بیگواھی ءُ بلوچ راجداریں ورنایانی تیرسپتگیں زانگولیں جونانی دست کپگ انسانی ھکانی درگت سکیں بدتریں املے-