بلوچ اسٹوڈنٹس ایکشن کمیٹی ءِ دو بنزھانی نیاد، نیاد ءَ نوکیں گچینکاری

بلوچ اسٹوڈنٹس ایکشن کمیٹی کراچی ھنکین ءُ شال ءِ ھنکین ءَ دو نوکیں بنزھانی گچینکاری کرتگ ءُ اے نیاد لیاری ءُ شال بی ایم سی ءَ جوڑینگ بیتگ اَنت نیاد ءَ بنزہ ءِ سروک اوریس بلوچ اَت ءُ شال ءِ ھنکین ءِ بنزہ ءِ کمک کارمستر فرھاد بلوچ ھوار اِت بیتگ اَنت –

نیاد ءَ گچینی ءِ مھمان لیاری بنزہ ءِ نعمان خالد ءُ ھواریں مھمان ھنکینی کمک کارمستر فوزیہ بلوچ ءُ شال ءَ گچینی ءِ مھمان اقرا بلوچ ءُ ھواریں مھمان فرید بلوچ ھوار بیتگ اَنت –

دیوان ءَ ھنکینی نیاد ھال، گوستگیں بُنزہ ءِ اھوال، شرگداری سرھال، گلی کار ، میان اُستمانی ءُ دمگی سیاسی جاورھال ءُ آیوکیں گامگیجانی سرھال ءِ سر ءَ شرّی ءَ تْران کنگ بُوتگ۔

نیاد ءِ تہ ءَ گْوستگیں ردی ءُ نزوریانی سر ءَ بھر زیروکیں باسکاں ھورت ھورت ءَ چمشانک دات ءُ آھانی گیش ءُ گیوار ءِ سر ءَ ھم گپ کنگ بیتگ۔ نیاد ءِ تہ ءَ دراھیں باسکاں گل ءِ کارانی گھتری ءُ دیمروئی ءِ ھاتر ءَ جوانیں ءُ زانشتی دروشمے ءَ باوست کُت ءُ ھرچ باسک ءَ وتی وتی شور ءُ سلاہ دیوان ءَ ایر کُت اَنت ءُ دراھیں بن گپانی سر ءَ باوست ءَ پد آؤکیں گامگیج ءِ تہ ءَ بُنزہ ءِ نوکیں اگدہ دار گچین کنگ بوت اَنت کار مستر شمح بلوچ ، کُمک کار مستر وقار بلوچ
کار گشاد : حمل رفیق کُمک کار گشاد : شّے رضا شنگکار : شاہ جان نامینگ بیتگ اَنت-

گُڈسر ءَ ھنکینی کماش نعمان خالد ءَ نوک گچین بوتگیں سنگت سوگند دات اَنت ءُ ھمے اُمیت درشانت کہ نوکیں سنگت گل ءِ کاراں پہ شرّی ءَ دیم ءَ بَرنت ءُ ھچ چُشیں کارے ءِ بھر نہ بنت کہ آئی ءِ سَوَب گَل ءُ گَل ءِ پروگرام تاوان بار بہ بیت-

ھمے رنگ ءَ شال ءَ بی ایم سی بنزہ ءِ گچینکاری بیتگ ءُ نوکیں اگدو دار گچین کنگ بیتگ اَنت –

نوکیں اگدودارانی تہ ءَ سخی بلوچ کارمستر، افضل بلوچ کمکارمستر، میردوست کارگشاد، یحیٰی بلوچ کمکارگشاد ءُ ھنیپ بلوچ شنگکار نامینگ بیتگ اَنت –

بلوچ اسٹوڈنٹس ایکشن کمیٹی ءِ نوکیں شالگشتی گچینی ءَ پد بلوچستان ءَ ھوار بازیں جاھاں ائی ءِ بنزھانی نوکی گندگ ءَ آیگ ءَ اِنت –