روکپتی بلوچستان ءَ ایرانی پولیس ءَ یک ٹن ئِے ءُ دو سد سیر تریاکی دستیگ کنگ ءِ ٹاہ داتگ

سر بیتگیں ھالانی رد ءَ سیستان ءُ بلوچستان ءَ ایرانی پولیس ءَ یک ٹن ئِے ءُ دو سد سیر تریاکانی دستیگ کنگ ءِ ھال رسانکدراں شنگ کرتگ –

ایرانی پولیس ءِ رد ءَ دستگیں کرتگیں تریاک سیستان ءُ بلوچستان ءِ دمگ سراوان ءَ کرتگ اَنت –

پولیس ءِ رد ءَ گوستگیں روچ ءَ چیریں ھالے ءِ پرمان ءَ پولیس ءُ دگہ چیریں ادارھاں دمگ انگیر کرتگ کہ اود ءَ پولیس ءَ بیڑ برتگ ءُ چریشی ءَ نشہ باپاریانی بنجل ءَ تیرگواری کنگ بیتگ –

پولیس ءِ رد ءَ نشہ باپاریاں پولیس ءِ تیرگواری کرتگ ءُ ھردوکیں نیمگاں تیرگواری ءَ پد نشہ باپاری چستگ ءُ تتکگ اَنت ءُ آیاں وتی نشہ سامان چگل داتگ اَنت –

پولیس ءِ رد ءَ اود ءَ پولیس ءَ یک ٹن ئِے ءُ دو سد سیر تریاک دزکپتگ ءُ آیانی بنجل ءَ سِلاہ ھم دزکپتگ اَنت –

پولیس ءِ گوشگ اِنت کہ اے نشھی سامان سیستان ءُ بلوچستان ءَ اتکگ اَنت ءُ ڈیھ ءِ دگہ استاناں شنگ ءُ شانگی ءَ چِن ءُ لانچ ءَ بیتگ اَنت کہ پولیس ءَ چیریں ھال ءِ سر بیگ ءَ اے بے سوب کرتگ اَنت –

دمگی مردمانی نیمگ ءَ اے ھال ءِ راستی پدر نہ بیتگ ءُ گوست ءَ ھم ایرانی واکداراں چوشیں چیزانی دستیگ کنگ ءِ ھال ماں رسانکدراں شنگ کرتگ اَنت –

زانگ بہ بیت سیستان ءُ بلوچستان ءَ بازیں مردمے نشہ باپاری ءِ سر ءَ دزگیر کنگ ءُ پد ءَ آیاں نشہ باپاری ءِ بھتام ءَ پاھو دیگانی ھال رسانکدراں شنگ بیتگ اَنت –

لس مردمانی گوشگ اِنت کہ سیستان ءُ بلوچستان ءَ دگہ روزگار ءِ نہ بیگ ءَ باز مردم نشہ باپاری ءِ وڑیں کارانی دیمپان اَنت ءُ چریشی ءَ چہ آیانی زندمان ءَ تاوانباری ھم بیگ ءَ اِنت –