شال ءَ بیگواھیں مردمانی ھاتر ءَ زھرشانی برجاہ

پاکستان ءُ آئی ءِ چیریں ادارھانی نیمگ ءَ مردمانی چست کنگ ، بجن، چگل دیگ ءِ پالیسیانی سرجمی ءَ بے سوبی ءَ پد نوں آئی ءَ ٹَک داری ءِ پالیسی وتیگی کرتگ اَنت- ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار دوسد ءُ نود ءُ.ھپت روچ سرجم بوتگ – بلوچ یکجھتی کمیٹی ءِ رھشون ءُ باسکاں ھوار دگہ پگرانی منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

چہ مستونگ ءَ سال دوھزار ےُ سیزدہ ءَ زورانسری آوار جنگ بیگواہ بوتگیں لیویز کارمند سعید احمد شاھوانی ءِ مات ءَ بنجل ءَ اتکگ ءُ وتی زھرشانی نبشتہ کنائینتگ –

وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ ھر بلوچ پرزند بلوچ ءُ بلوچستان ءِ گپ ءَ جنگ ءَ اِنت، ھر بلوچ پرزند زانت ءُ زانشت ءِ گپ ءَ جنگ ءَ انت، ءُ ھمے زانت ءَ بلوچ مات، گوھار، چک، براتاں بلوچستان ءِ ایردستی ءُ بلوچانی سر ءَ پاکستان کرتگیں زلم ءُ زوراکیاں آھاں پیش داریت –

آئی ءِ گوشگ ات کہ اول ءَ پاکستان ءِ چیریں ادارھاں مردم چست کنگ ءِ پالیسی وتیگی کرت، پد ءَ بجن چگل دیگ ءِ پالیسی ءُ نوںآ سرجمی ءَ اے پالیسیاں چہ بے سوب بوتگ گڑا نوں آئی ءَ ٹکداری ءِ پالیسی وتیگی کرتگ اَنت-

آئی ءِ گوشگ ات کہ بلوچ چکچینی ءَ پاکستان ءِ چیریں ادارہ ءُ دمگی ڈیتھ اسکواڈ ھوار انت ءُ ھیرانگی گپ ھمیش انت کہ میان استمان ھم اے درگت بے توار انت –

آئی ءَ گوشتگ کہ زوراکیں ریاست ءُ آئی ءِ جوڑ کتگیں ڈیتھ اسکواڈ تاں کدین ءَ پُرایمنیں جھدے بگیردار بنت، اے گپ ھر بلوچ ءَ یات دارگی انت کہ پُرایمنیں جھد ءَ باج برگ بیت ھمے ھاتر ءَ مارا درسیں بلوچاں ھمنچو زوت بیت املی وڑ ءُ ڈول ءَ آئی ءِ بھر جوڑ بوگی انت –