سیمسر بندش: تربت ءَ دربندیں ھرتال، دراھیں باپاری بنجل بند

بلوچستان ءِ دمگ کیچ ءِ بنجاھی شھر تربت ءَ بارڈر ٹریڈ یونین ءِ نیمگ ءَ ایرانی بارڈر باپاری پُرکاریانی بندش ءِ ھلاپ ءَ تربت ءِ شھر ءَ ھوار بازیں جاھاں ھرتال برجاہ اِنت –

ھرتال سوب ءَ شھر ءِ دراھیں مزن ءُ کسانیں باپاری بنجل ءُ دگانی سر ءَ آؤگ ءُ آیگی نہ بوگ ءِ بروبری ءَ اِنت –

رودراتک ءُ روکپتی بلوچستان ءَ سیمسر ءِ سر ءَ باپاری بندش ءِ ھلاپ ءَ ھرتال ءِ پلامرزی آل پارٹیز کیچ، تربت اول سوسائٹی،انجمن تاجراناں ھوار سیاسی ءُ چاگردی مھلوک کنگ ءَ اِنت ئِے –

شھر ءَ دربندیں ھرتال ءِ وھد ءَ ٹریڈ یونین ءُ سیاسی ءُ چاگردی مردماں شھید فدا چوک ءسل زھرشانی ھم کرتگ –

ھمے وھد ءَ آیاں گوشت کہ بارڈر ءِ بندش ءَ اد ءَ مھلوک ءِ کوش ءِ بروبری اِنت، ھاکمی تکاں اے جیڑہ ءَ الکاپی ءِ دلگوش دیگ ءَ ابید چُکی تسلو دیگ ءَ اَنت –

آیاں گوشت بارڈر ءَ بندوکیں مردمانی لوگاں گژن ءُ شد ءَ وتی پانچگ ایر داتگ اَنت آیانی آس روکی ھم بند اَنت بلے ھاکماں ھچ پروا نیست کہ اد ءَ مَھلوک تُری شد ءَ بہ مِر اَنت –

آیاں گوشت کہ بارڈر ءِ باپاری سرجم ءَ شرپمندی ءَ داں جد ءُ جھد ءَ برجاہ داریں –

دمگی مردمانی رد ءَ مروچی بیتگیں ھرتاک ءِ سوب ءَ انجمن تاجران تربت دو ٹولیانی تہ ءَ بیتگ اَنت یک ٹولی ءِ شاہ دوست دشتی ءِ سروکی ءَ بارڈر ٹریڈ یونین ءِ ھرتال ءِ پلامرزی کرتگ وھدیکہ ھاجی کریم ءِ سروکی ءَ انجمن تاجراں ھرتال ءَ جتائی گوشتگ ءُ دمگداراں ھرتال ءِ بے سوب کنگ ءَ کمک لوٹ اِتگ اَت –

اود ءَ نامی ئیں تاھر شاہ دوست دشتی ءِ سروکی ءَ تاجرانی یک ٹولی ءَ ھرتال ءِ سرجم ءَ پلامرزی کرتگ ءُ دکانداراں ھرتال ءِ سومند کنگ ءِ دزبندی کرتگ ءُ گوشتگ کہ بارڈر سرجمیں مکران ءِ زرکاری ءِ جیڑہ اِنت –