کیچ ءَ پاکستانی پوج ءِ سر ءَ اُرش، اُرش ءِ زمّہ واری بی ایل ایف ءَ منّ اِتگ

دشت ھوچات ءَ پاکستانی پوج ءِ سر ءَ اُرش کُتگ دو کارمند کُشتگ ءُ بازینے زدگ کتگ اَنت – میجر گوھرام بلوچ

سربیتگیں ھالانی رِد ءَ مروچی دوشمبے ءَ ناشناسیں سلاہ بندیں مردماں کیچ ءِ دمگ دشت ءَ پوجی پانگس ءِ سر ءَ اُرش کُتگ، اُرش دشت ءِ دمگ ھوچات ءَ گٹی کور ءَ برجاھیں پاکستانی پوج ءِ پانگس ءِ سر ءَ کنگ بوتگ –

اُرش ءَ پاکستانی پوج ءَ جانی ءُ مالی تاوان رس اتگ، سلاہ بندیں مردم در آیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں مروچی دو شمبے ءِ بیگاہ ءِ ادار شش ءَ کیچ ءِ دمگ دشت ھوچات ءَ گٹی کور ءَ برجاھیں پاکستانی پوج ءِ پانگس ءِ سر ءَ دور جنگیں توپک ءُ دگہ وتکار ءُ مزنیں سلاھانی گون ءَ اُرش کتگ-

جارکش ءَ گوشتگ کہ اُرش ءِ آسر ءَ پاکستانی پوج ءِ دو کارمند مرتگ ءُ بازینے زدگ بوتگ اَنت-

گڈسر ءَ جارکش ءَ وتی درشان ءِ تہ ءَ گوشتگ کہ اے دابیں اُرش بلوچستان ءِ آجوئی ءَ تاں برجاہ مان انت –