نبشتانک: گُڈی تیر
نبشتہ کار: ناسر بلوچ
رجانکار: وسیم بلوچ
دی بلوچستان پوسٹ
چِلّو وتی زوران ات، دسمبر ءِ ماہ اَت ءُ گوریچ دمّال کنان ات، ھرکس وتی گِسانی تہ ءَ ھیٹر اسٹوپانی دیم ءَ نندوک ات، ھلک ءُ میتگ انچو بے چِڑکہ ءُ بے توار ات انت گْوش ئے انچو سما بیت کہ اے میتگاں مردم ھچ زات نیست بلے ھمے ھلک ءُ میتگاں کمیں ھما دیم بُرزیں کوھانی ھشیمیں گَٹاں،گوریچ ءَ گوں دیم پہ دیم لھتے بے نپاد سارتی ءَ سَگگ ءَ ات انت۔
اے بے نپاد یک ٹوھیں مکسدے ءُ مزنیں پگرے ءَ گوں ھون بادینوکیں سارتی ءَ سگگ ءَ ات انت اگاں آیاں آسراتی بہ لوٹیتیں آیاں ھم ھما گرمیں کوٹی ھما ہیٹر اسٹوپانی دیم ءِ نِندگ نسیب ءَ بوتگ ات بلے اے ھما جزبگ انت کہ اے جزبگ توکلاں گیش مھکم کن اَنت ءُ ھاٹیگاں تمرد۔
بولان ءِ گَٹانی تہ ءَ ھم رِد ءَ آؤکیں ورناھاں پنچ روچ ءِ سپر بُرتگ ات ءُ دم اش ھم بالا نہ کتگ ات ءُ آیاں منزلے ءَ سر بوگی ات ءُ آرام کنگی ات۔
آیانی چم سُھر ات انت ءُ آیانی چمانی سُھری زورگپتگیں ھاک ءِ آجوئی ءِ تران ءَ کنگ ءَ ات انت۔
ھمے وڑیں سپرے ات کہ ھرکس دوئمی ءَ گیش چہ گیش اوپار کنگ سنگتاں ایمن کنگ ھر سرمچار ءِ پرز جوڑ اَت ۔ گوں بے وابیں چماں سنگتانی دل سیاہ چاہ لوٹگ ءَ ات ھر سرمچار ءَ چہ یکے دوئمی ءَ ساری وت ءَ ساڑی کت چی ءَ کہ اے ھما سگ ءُ جزبگ انت کہ آ پہ آجوئی ءِ لوٹ ءَ وت ءَ پہ وتی راج ءِ ھاتر ءَ کربان کنگ ءَ ساڑی انت۔
ھمے ھون بادینوکیں سارتی ءَ جنگی بالیگرابانی (جھازانی) توار بوت۔ سنگتاں سنگر گپت انت ھمے میان ءَ سنگتے ءَ جیڑ ات اگاں ما جنگ بدیے گڑا مارا سینزدھیں سنگتاں ساگانی کربانی دیگ کپ ایت جوانتر ھمیش اِنت کہ سنگتاں کشان ءُ وت جنگ دیان کناں ءُ دژمن ءَ نیست ءُ نابود کناں۔
ھمے پگر ءِ سنگت وھدے گوں ایدگہ سنگتاں سرسوج کنت گڑا ھرکس پہ کربانی ءِ دیگ ءَ ساڑی بوت ھرکس ءَ وت ءَ دیم ءَ کنگ ءِ لوٹ کت، ھرکس ھمے لوٹگ ءَ ات کہ پہ سنگتانی درکنگ من کربان باں۔
رھبر رھشون ءَ گُڈی سوڈگ کت ءُ کُلّیں سنگت دیم ءَ پہ درکپگ ءَ راھی کت انت ءُ ایوک ءَ سنگراں داران ات ءُ تیر گواری کنان اَت ءُ دژمن ءِ لوٹاں بے سوب کنان ات۔ آئی لوٹ ات کہ سنگتاں پھریزیں جاگہھے ءَ سر بہ کناں۔
دژمن ءَ پْروش دیان ءَ وھدے کہ آئی تپنگ ءِ تیر ھلاس بوت انت، چہ وتی کیسگ ءَ گڈی کش ات ئِے ءُ وت ءَ دژمن ءِ تیرانی ءُ دست ءِ آگ ساری گوں وتی گڈی تیر ءَ ابدمان بوت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔