سر بیتگیں ھالانی رد ءَ گوستگیں شپ ءَ سلاہ بندیں مردماں کیچ ءِ بنجاھی شھر تربت ءَ تیرگواری کرتگ ءُ یک مردمے کُشتگ –
تیرگواری ءِ وئیل تربت ءِ ھند شَے کھن ءَ دیم ءَ اتکگ کہ اود ءَ سلاہ بندیں مردمانی تیرگواری ءَ ملا عزیر نامیں مردمے بیران بیتگ –
دمگی مردمانی رد ءَ کُشتگیں مردم ءِ سیادی سرکاری پُلامرزی ءَ جوڑ بیتگیں گل ڈیتھ اسکواڈ ءَ اِنت –
زانگ بہ بیت بلوچستان ءَ پاکستانی پوج ءُ چیریں ادارھاں بازیں گلانی جوڑ کنگ ءِ بھتام ھست اِنت کہ آیاں لس نام ءَ ڈیتھ اسکواڈ ءَ گوانک کنگ بنت –
گوست ءَ اے وڑیں اُرشانی زمہ واریاں گیشتر بلوچ آجوئی لوٹوکیں سلاہ بندیں گل منّگ ءَ اَنت بلے تنی وھدی اے اُرش ءِ زمہ واری ھچ گل ءَ نہ منّ اِتگ –