شال ءَ بیگواھیں بلوچانی ھاتر ءَ زھرشانی برجاہ

انسانی ھکانی ادارھانی نیمگ ءَ بیگواھیں مردمانی کھولاں ھچ وڑیں کانودی کمکے نیست دلگوش کرزیں گپ ءِ ایش انت کہ انسانی ھکانی ادارھاں بیگواھیں مردمانی ھما کچ ءُ کساسی رپورٹ کہ شنگ کرتگ آ وی بی ایم پی رد کُتگ اَنت – ماما قدیر

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھشتاد ءُ ھپت روچ سرجم بوتگ – ھب چوکی ءَ چہ اللہ داد بلوچ ، غلام محمد بلوچ، شال ءَ چہ کامریڈ سلطان کاکڑ ءُ دگہ پگرانی منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءَ زوراکی برجاہ انت پاکستان ءِ بنجاھی سرکار ءَ ھم اے جیڑہ ءِ سر ءَ مدامی وتی درشانانی تہ ءَ بدلی آرتگ راستی ءَ بچارے پنجاہ ھزار ءَ چہ گیش بلوچ پرزند پاکستانی پوج ءِ زندانانی تہ ءَ مدامی مرگ ءِ دیمپانی ءَ کنگ ءَ انت –

آئی ءِ گوشگ ات کہ پاکستان وتی اے کتکاریانی سر ءَ انکاری انت میان استمان ءِ دیم ءَ وتی پلگارگ ءِ ھاتر ءَ پاکستانی سرکار ءَ بازیں مراگش ءِ برجم داشتگ ءُ بازیں کمیٹی ءِ ھم اڈ داتگ بلے ھچ وڑیں کمیٹی ءَ روچ مروچی وتی رپورٹ دیم ءَ نیاؤرتگ اَنت –

آئی ءِ گوشگ ات کہ انسانی ھکانی ادارھانی نیمگ ءَ بیگواھیں مردمانی کھولاں ھچ وڑیں کانودی کمک نیست – دلگوش کرزیں گپ ءِ ایش انت کہ انسانی ھکانی ادارھاں بیگواھیں مردمانی ھما کچ ءُ کساسی رپورٹ کہ شنگ کرتگ آ وی بی ایم ءَ پی رد کُتگ اَنت –

ماما قدیر بلوچ ءِ گوشگ ات کہ بلوچستان ءِ تہ ءَ ھمک روچ ھر تک ءُ پھناتاں سیادی داروکیں مردم پاکستانی پوج ءُ چیریں ادارھانی دست ءَ آوار جنگ ءُ کُشگ بوگ ءَ انت، ھمے واستا وی بی ایم پی پاکستانی ھاکم، پارلمنٹ ءُ دگہ ادارھاں چہ ھچ وڑیں اوست ءِ امیت ءَ نداریت پرچا کہ آ گوستگیں دوازدہ سالاں بید ء چہ دروگیں تسلی ءَ دیم ءَ شُت بوت نہ بوتگ انت –