بلوچستان جتا جتائیں دمگاں تیرگواری وئیلاں چار مردم بیران، یک جونے دست کپتگ

سربوتگیں ھالانی رِد ءَ بلوچستان ءِ دمگ سبی، شال، دکی ،مستونگ ءُ چمن ءَ تیرگواری ءِ وئیلاں سَے مردم بیران، سینزدہ ٹپی، گوستگیں روچ ءَ تیرگواری ءِ وئیلے ءَ ٹپی بوتگیں ورنا بیران، وھدیکے بلوچستان ءِ دمگ ھزدار ءَ جونے دست کپتگ –

گیشیں ھالانی رِد ءَ بلوچستان ءِ دمگ سبی ءَ سولنگی ٹک ءِ دو ٹولیانی میان ءَ جنگ ءُ چوپ بوتگ – جنگ چوپ ءَ یک مردمے بیران ءُ دو مردم ٹپی بوتگ اَنت –

بیران بوتگیں مردم ءِ پجار شبیر احمد ء وزیر خان وھدیکہ ٹپی بوتگیں مردمانی پجار عبدلقادر ء خدابخش، عبدالغفور ءِ ناماں چہ بوتگ انت – دمگی پھازداراں وت ءَ وئیل جاہ ءَ سرکتگ ٹپی ءُ بیران بوتگیں مردم نادراھجاہ ءَ سرکتگ انت –

شال ءَ شیرانی ٹک ءِ دو ٹولیانی میان ءَ ھم جنگ ءُ چوپ بوتگ چریشی ءَ ھشت مردم ٹپی بوتگ اَنت –

ھالانی رِد ءَ مروچی شال ءِ دمگ ھزار گنجی ءَ شیرانی ٹک بنگوار ءِ ٹولیانی میان ءَ وت ماں وت ءَ جنگ ءُ چوپ بوتگ – جنگ ءُ چوپ ءَ ھشت مردم ٹپی بوتگ اَنت –

اھوالکار ءِ رِد ءَ ٹپی بوتگیں مردمانی تہ ءَ یک مردمے ءِ جاور نگیگ گوشگ بوگ ءَ انت پہ گیشیں الاج ءِ ھاتر ءَ کراچی دیم دیگ بوتگ –

ھمے وڑ بلوچستان ءِ دمگ دکی ءَ ناشناسیں مردمانی تیر گواری ءَ لیویز کارمندے ءَ ھوار سَے مردم ٹپی بوتگ اَنت –

تیرگواری وئیل دکی ءَ ھوسٹری ءِ دمگ برا ءَ دیم ءَ اتکگ کہ ناشناسیں مردماں پیک اپ گاڑی ءِ سر ءَ تیرگواری کتگ، تیرگواری ءَ لیویز کارمند محمد اقبال ء عبدالحمید ءَ ھوار سردار محمد ء لعل محمد، سرور ءِ حاجی اختر ٹپی بوتگ انت –

ٹپی بوتگیں مردم ھما دمان ءَ دکی نادراھجاہ ءَ سرکنگ بوتگ انت ٹپانی درمان کنگ ءَ پد یک ٹپی یے شال ءَ دیم دیگ بوتگ –

دگہ تیرگواری وئیلے بلوچستان ءِ دمگ مستونگ ءَ دیم ءَ اتکگ کہ ناشناسیں مردمانی تیرگواری ءَ یک مردمے بیران بوتگ- وئیل مستونگ ءِ دمگ پمبا ءَ دیم ءَ اتکگ، بیران بوتگیں مردم ءِ پجار بھار خان ءِ نام ءَ زانگ بوتگ –

پولیس ءِ رِد ءَ اے مرد مستونگ ءِ دمگ گردگاپ ءِ نندوک انت پولیس ءَ جون دست گپتگ ءُ نادراھجاہ ءَ سر کتگ اود ءَ اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ –

بلوچستان ءِ دمگ چمن ءَ سلاہ بندیں دُزانی تیرگواری ءَ فرسٹ کلاس کرکٹ لیبی بیران بوتگ –

بیران بوتگیں کرکٹ لیبی ءِ پجار محمد ءِ نام ءَ چہ بوتگ – ھمے گوشگ بوگ ءَ انت کہ دُزاں لیبی ھما وھد ءَ تیرانی آماچ کُتگ کُشتگ کہ آ وتی گِس ءَ روگ ءَ بوتگ کہ نیم راہ ءَ دُزاں آ داشتگ ءُ پرپٹ ءِ پچگرگ ءِ جُھد کُتگ – پرپٹ نہ دیگ ءِ سوب ءَ دُزاں آ تیرانی آماچ کُتگ کُشتگ وھدیکہ دُزاں آئی پرپٹ زُرتگ ءُ تتکگ –

اے درگت ءَ آئی ءِ کھول ءِ مردماں لیبی ءِ جون ڈی سی کارگِس ءِ دیم ءَ ایر کُتگ ءُ زھرشانی کُتگ – آئی ءِ کھول ءَ لوٹ کُتگ دُز زوتاں دزگیر کنگ بہ بنت –

زانگ بہ بیت گوستگیں روچ ءَ مستونگ ءَ بس ھڈہ ءِ نزیک ءَ
ناشناسیں مردمانی تیر گواری ءَ ٹپی بوتگیں ورنا محمد عاصم ء گلام مصطفٰی علیزی ٹپانی درد نہ سگتگ ءُ بیران بوتگ –

دومی نیمگ ءَ بلوچستان ءِ دمگ ھزدار ءَ سٹی تانہ ءِ نزیک ءَ یک مردمے ءِ جون دست کپتگ –

آئی ءِ پجار محمد اسحاق ءِ نام ءَ زانگ بوتگ ھمے گوشگ بوگ ءَ انت اے مرد اسکول ماسٹر ءِ بوتگ ءُ سوراب ءِ جھمنند انت –