ھاران ءَ ڈی سی گِس ءِ سر ءَ اُرش، اُرش ءِ زمّہ واری بی آر اے ءَ منّ اِتگ

اے اُرش ھاران ءِ ڈی سی عبدالسلام اچکزئی گوں زورگیریں پوج ءَ ھاسیں نند ءُ نیادانی پژدر ءَ آئی ءِ سر ءَ کرتگ – بیبگر بلوچ

سربوتگیں ھالانی رِد ءَ گوستگیں روچ ءَ روچ ایرؤگ ءِ وھد ءَ ھاران ءَ ڈی سی ءِ گِس ءِ سر ءَ ناشناسیں مردماں دز بمب اُرشے کُتگ – اُرش ءَ آئی ءِ گِس ءَ تاوان رس اتگ بلے ھچ وڑیں جانی تاوان ءِ ھال نیست –

دومی نیمگ ءَ بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ اے اُرش ءِ زمّہ واری ءَ منّ اِتگ ءُ گوشتگ کہ مئے سرمچاراں گوستگیں روچ ءَ روچ ایرؤگے وھد ءَ ھاران ءَ ڈپٹی کمشنر ءِ گِس ءِ سر ءَدز بمبے چگل داتگ، اُرش ءِ آسر ءَ ڈی سی ءِ گِس ءَ کمے تاوان رَس اِتگ-

جارکش ءَ گوشتگ کہ اے اُرش ھاران ءِ ھستیں ڈپٹی کمشنر عبدالسلام اچکزئی ءِ سر ءَ ھمے واستا کنگ بیتگ کہ آئی ءَ گوں پاکستانی پوج ءَ ھاسیں نند ءُ نند کرتگ ءُ بلوچ یاگیانی بگیری ءَ سوڑ اِتگ – اے ڈی سی دمگ ءِ تہ ءَ ایپ سی ءُ چیریں ادارھانی گُشگ ءِ پد ءَ وتی ڈبہ ءُ زمہ واریاں چہ ناجائزیں سیت ءُ نپ چست کنت ءُ دمگ ءَ وتی چیردستیں بلوچ کاردارانی تنگ کنگ ءَ ابید آھاں پہ ترس ءُ بیھار پاکستانی پوج ءِ بازیں رد ءُ مَکری ئیں مراگشاں ھوار کنت-

گڈسر ءَ جارکش بیبگر بلوچ ءَ وتی درشان ءِ تہ ءَ گوشتگ کہ مئے اُرش ڈیھ ءِ آجوئی ءَ تاں برجاہ مان انت-