آزمانک: آ اَنگت سپر ءَ اِنت
آزمانکار: مھم جان گُل
دی بلوچستان پوسٹ
دو لِچّ ءِ بان اِت اَنت کہ دوئیں بانانی دیم ءَ یک دْراجیں برانڈھے ھست اَت برانڈہ ءِ یک نیمگے کَپتگ اَت ءُ یک نیمگے لُونجان اَت ، دل ودار ءَ اَت ئے کہ کدی اے برانڈہ ءِ کَپّ ، کپ اِیت؟-
اے لوگ ءَ ھشت مردُم ءَ وتی زندگی داں یک بلائیں مُدّتے ءَ گْوازینت، بلے پد ءَ آستے آستے اے لوگ ءِ مردم کَم بُوھان بیتاں ءُ گُڈّی ءَ اے لوگ ءَ کس پش نہ کپت ءُ لوگ ویران بوت۔
ھمیشانی تہ ءَ یکّے دیراں پَد اَتک وتی لوگانی چارگ ءَ ، بلے اُود ءَ لوگ نیست اَت ھُشکیں ھاک ءُ کنٹ اِت اَنت آ گوں ابیتکیں چمّاں وتی لوگ ءُ جاگھاں چارگ ءَ اَت، ھیرانگی ءَ گوں نِشت ءُ وتی لوگانی ھاکانی سر ءَ جیڑگ ءَ لگّ اِت ءُ چمّاں گْوش ئے دریایے تچگ ءَ اَت بلے گندگ بُوَگ ءَ نہ اَت کہ دریا مست اِنت ءُ دلمانگ اِنت کہ وتی چَولاں یلہ بِہ کنت، بلے دیمے میتگ ءِ سرجمیں مردُم اَتکگ ءُ اُشتاتگ اِت اَنت نہ زان آں پرچا!بلے بلائیں مُچی یے بوت ءُ چاریں نیمگاں انگیراں گِپت اِش ءُ کسّ ھچ گْوشگ ءَ نہ اَت، بس چارگ ءَ اِت اَنت بلے پرچا اتکگ اِت اَنت؟ ھال پُرسی ءَ؟ دردانی کم کنگ ءَ ؟ آگاں آئی ءِ سیل ءِ چارگ ءَ، پاد اتک ءُ چادرے چنڈّ اِت دیم دات ئِے پہ کبرستان ءَ ، بلے پُشت ءَ چَکّے نہ جت۔ پرچا کہ آئی ءِ دل جَنَگ ءَ اَت میتگ ءِ سرجمیں مردُم آئی ءِ سر ءَ کندگ ءَ اَنت ءُ اے وھد ءَ آئی ءِ دریا ءَ وتی چَول یلہ داتگ اِت اَنت کبرِستان نزّیک کُت ئِے بلے کبرِستان ءَ شُتے نہ کُت ، چی کہ کبرِستان تُرسناک اَت ۔ دیر ءَ نِشت ءُ کبرِستانے چار اِت، گوں کبرستان ءَ گپّ ءَ لگّ اِت ءُ گْوشت ئے کہ مہ جیڑ ءُ ھچ گَم مہ کن ، پمّن ءَ یکروچے الم کَیت کہ من پہ ترا کا آں ، گُڑا پہ دائِمی پد ءَ نہ رو آں ءُ دیر نہ نند آں ءُ نہ چاراں ، بلے مرچی ترا رُکست کن آں کہ من ءَ انگت بازینیے پَد جَنَگی اِنت آ گار اَنت، اگاں واتر کا آں گُڑا دُرستاں کاراں گوں بلے اَنوں من ءَ موکل بِہ دے کہ من رو آں آ پاد اَتک ءُ شُت۔
آئی ءَ وتی سپر بِنا کُت ءُ جنزان بوت ، برے برے کہ ھَور ءَ اَیر داتگ گُڑا آئی ءَ ھم وتی دریا ءِ مستیں چَول یلہ داتگ اِت اَنت ءُ نوں دل ءَ دلجم بیتگ کہ اگاں کسے من ءَ بِہ گِند اِیت منی سر ءَ نہ کند اِیت، پرچا کہ ھَور ءُ چَول ھَواری ءَ زاھِر نہ بَہ اَنت۔
آ وتی سپر ءَ مُدام مُھکم اَت ءُ کدی ھم دم نہ بُرتگ اَت ئے ءُ مرچی ھم سپر کنگ ءَ اِنت وتی مردُمانی شوھاز ءَ باریں کُجا اَنت ؟ چون اَنت؟ بلے یک گپّے آئی ءَ سک تکانسرکنگ ءَ اَت آ اے گپّ ءَ اَت کہ اگاں آ وتی مردُمانی شوھاز کنگ ءَ چِہ ساری زمین ءِ باھوٹ بہ بیت ، گُڑا پہ آیاں دِگہ شوھاز کنوک نہ بیت، ءُ آ گار بَہ اَنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔