شال ءَ بیگواھیں بلوچانی ھاتر ءَ زھرشانی برجاہ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھشتاد ءُ یک روچ سرجم بوتگ – بلوچستان ءِ جتا جتائیں دمگاں بیگواھیں مردمانی کھولاں بنجل ءَ اتکگ ءُ زھرشانی نبشتہ کنائینتگ اَنت-

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ بلوچاں زندگ بوگ ءِ ھک پچ گرگ بوتگ، ھزارانی کچ بلوچ آوار جنگ ءُ بیگواہ کنگ بوتگ انت کہ آھانی پشت ءَ آھانی کھول مدامی نا امیتی ءُ ازابی زند گوازینگ ءَ انت –

آئی ءِ گوشگ ات کہ وھدے کہ لوگے یکیں کمائینوک آروک، کسان سالیں زھگانی سر ءِ سر ءَ پہ مھری سماروک آئی ءِ پت یک زھگے ھاتر ءَ آئی ءِ درسں بہ بیت، آئی ءِ سمبالوک بہ بیت گڑا آئی ءِ زند ءَ ھمگرنچیں درسیں چیز بیگواہ بنت –

ماما قدیر بلوچ ءَ انسانی ھکانی زمہ واریں انسان آئی اے رحمان ءِ بیرانی ءِ سر ءَ دلپدردی درشان اتگ ءُ گوشتگ کہ آئی اے رحمان ءَ مدامی پہ بلوچ ءُ دگہ ایردستیں راجانی گوما مدامی اشتوک بوتگ ھاسکر بیگواھیں مردمانی جیڑہ ءِ سر ءَ مدامی آ ھوار بوتگ اے ناھکی ءِ بگیری توار چست کتگ –

ماما قدیر بلوچ ءِ گوشگ ات کہ آئی اے رحمان پہ بلوچانی ھاتر ءَ سبین محمود ءِ وڑیں درد بھر کنوکیں انسانے بوتگ کہ آئی ءِ بیرانی ءَ ایردستیں راج یک سھارا ءَ چہ زبھر بوتگ انت –

ھمے وڑ بیگواھیں نودربر رھشون زاکر مجید بلوچ ءِ مات ءَ وتی شنگ تامری درشان ءَ گوشتگ کہ باندا سینزدہ اپریل ءَ شال پریس کلب ءِ دیم ءَ زاکر مجید بلوچ ءُ دگہ بیگواھیں مردمانی آوار جنی ءِ بگیری ءَ زھرشانی کنگ بیت انت –

اے درگت ءَ نودربر رھشون شبیر بلوچ ءِ گھار سیما بلوچ ءُ ایکٹوسٹ جمیلہ بلوچ ءَ ھم وتی تامری درشان ءَ چہ مھلوک ءَ لوٹ کتگ کہ اے زھرشانی ءَ جوانی ءَ بھر بہ زور انت –