کیچ ءَ ریاستی چاریگ ءِ بنجل ءِ سر ءَ بیتگیں اُرش ءِ زمہ واری بی ایل ایف ءَ منّ اِتگ

بلوچستان ءِ دمگ کیچ ءِ بنجاھی شھر تربت ءَ گوستگیں شپ ءَ ناشناسیں مردماں ریاستی چاریگ ءِ بنجل ءِ سر ءَ دز بمب اُرشے کُتگ-

اُرش سنگانی سر ءَ ریاستی چاریگ سمیر سبزل ءِ گِس ءِ سر ءَ کنگ بوتگ بلے ھچ وڑیں جانی تاوان ءِ ھال نہ بوتگ –

زانگ بہ بیت سمیر سبزل لس مھلوک ءَ ڈنک وئیل ءِ بنجاھی کتکار گوشتگ بلے گوستگیں روچاں سمیر سبزل آمیدگس ءِ پرمان ءَ یل کنگ بیتگ –

گوستگیں سال ءَ تربت ءِ دمگ ڈنک ءَ یک گِسے ءِ دور کنگ ءُ دزی ءِ میان ءَ تیرگواری ءَ ملک ناز نامیں زالبولے کُشگ بوتگ اَت ءُ آئی ءِ کسان سالیں جنکو برمش ٹپی بوتگ اَت – اے ٹی سی آمیدگس مکران ءِ جج رفیق لانگو ءَ گوستگیں روچاں چار کُتکار سزا داتگ انت وھدیکہ سمیر سبزل یل کنگ بوتگ –

گوستگیں شپ ءَ ناشناسیں مردماں ھمے کتکار ءِ گِس ءِ سر ءَ دز بمب اُرشے کُتگ ،اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گْوھرام بلوچ ءَ وتی شنگ کرتگیں درشان ءِ تھ ءَ گوشتگ کہ گوستگیں شپ ءِ ادار نُھ ءُ نیم ءَ مئے سرمچاراں تربت ءِ دمگ سنگانی سرا ریاستی چاریگ سمیر سبزل ءِ گِس ءِ سر ءَ دز بمب اُرشے کُتگ –

آئی ءَ گوشتگ کہ سمیر سبزل ءُ آئی ءِ ٹولی ریاست ءِ سروکی ءَ بازیں چاگردی سلکاری کنگ ءَ اَنت بلے پہ زورگریں پاکستان ءَ بلوچانی چاریگری کنگ ءِ بدل ءَ آئی ءَ دُزی ءُ ڈُنگی ءَ ھوار ھمک وڑیں سلکاریاں یل کنگ بوتگ-

آئی ءَ گوشتگ کہ بازیں ارزیاں سمیر ءُ آئی ءِ ھمراھانی بگیری ءَ مھکمیں منانک بوگ ءُ چہ آیاں سلاہ دست کپگ ءَ ابید آ آمیدگس ءُ چہ بندیگجاھاں یل کنگ بیتگ اَنت – یات بہ بیت کہ گْوستگیں سال ءَ تربت ءَ بانک ملکناز ءِ کوش ءُ کودکیں برمش ءِ ٹپی کنگ ءِ میار ءَ سمیر سبزل مستریں میار بار بوتگ، بلے پاکستانی پوج ءِ سروکی ءِ سوب ءَ یل کنگ بوتگ-

گڈسر ءَ جارکش ءَ گوشتگ کہ سمیر سبزل ءُ آئی ءِ دُرسیں ھمراہ ءُ کمکار مئے نشانگ ءِ تہ ءَ اَنت۔ ما آیاں کجام ھم وھد ءَ نشانگ کن اِیں- چہ بلوچ راج ءَ دزبندی اِنت کہ اے وڑیں مردماں چہ گستا بہ بنت-