شال ءَ بیگواھیں بلوچانی ھاتر ءَ زھرشانی برجاہ

منی چُک ءَ ھچ وڑیں جُرمے نہ کُتگ یک دھکے ءَ گیش انت کہ آ ھمے ھاتر ءَ آوارجنگ ءُ بیگواہ کنگ بوتگ کہ آئی ءَ گوں نودربر سیاست ءَ سیادی بوتگ – راج بی بی

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھپتاد ءُ نُہ روچ سرجم بوتگ- بلیدہ ءَ چہ راجدار ءُ چاگردی باسکاں ھوار دگہ پگرانی منوگراں بنجل ءِ تر ءُ تاب کُتگ ءُ بیگواھیں مردمانی کھولانی گوم ءَ دلپدردی درشان اتگ –

بلوچ نودربر گل ءِ بیگواھیں نودربر رھشون زاکر مجید ءِ مات ءَ بنجل ءَ اتکگ ءُ وتی زھرشانی نبشتہ کنائینگ –

زاکر مجید بلوچ ءِ مات ءِ گوشگ ات کہ منی چُک ءَ ھچ وڑیں جُرمے نہ کُتگ یک دھکے ءَ گیش انت کہ آ ھمے ھاتر ءَ آوارجنگ ءُ بیگواہ کنگ بوتگ کہ آئی ءَ گوں نودربر سیاست ءَ سیادی بوتگ-

آئی ءَ دیمتر ءَ گوشتگ کہ راجداری ھچ وڑیں جُرمے نہ انت ءُ ما مدامی گوشگ انت کہ زاکر، زاہد کُرد بلوچ ءَ ھوار دُرسیں بیگواھیں مردمانی سر ءَ اگاں الزامے ھست گڑا آ آمیدگس ءَ آرگ بہ بنت بلے اد ءَ ادارہ وت وتی کانود ءُ رھبندانی لگتمالی ءَ کنگ ءَ انت –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ من زاناں کہ منی برازتکانی آوار جنی ءَ کئی دست مان انت وھدے آھگ ءَ آھانی ناماں دیم ءَ کاراں –

آئی ءَ دیمتر ءَ گوشتگ کہ مردماں زورانسری آوار جنگ، زانگولیں جونانی درایگے بند کنگ ءُ بلوچ پُرایمنیں جھد کنوکانی گوں دچار کپگے گپ پاکستانی ادارھانی ھاتر ءَ سر ءِ درد ءِ نہ انت پرچا کہ اسٹبلشمنٹ ناکہ بیگواھیں مردمانی جیڑہ گیش ءُ گیوار کنت ءُ ناکہ جونانی دور دیگ بند بیت –

آئی ءَ گوشگ ات کہ نوں آھانی کر ءَ بلوچ پُرایمنیں جد ءُ جھد ھلاس کنگ ءِ یکیں لٹ ءُ کُٹی راہ بچِتگ – جون گیشتر دور دیگ بیت، مردم چد ءُ گیش آوار جنگ بنت، پوجی لشکر کشیانی تھ ءَ گیشی آرگ بیت – بلوچ راج ءَ ایردست کنگ ءُ بلوچستان ءِ مال مڈیانی لٹ ءُ پُل ءِ ھاتر ءَ ھر وڑیں کار کنگ بوگ ءَ انت –

ماما قدیر بلوچ ءِ گوشگ ات کہ اے وھدی درسیں بلوچ چاگرد ءِ تھ ءَ یک تُرسے ودی بوتگ بیگواھیں مردمانی کھول ناکہ تھنا ترسینگ بوگ ءَ انت بلکیں وڑ وڑیں بیھار دیگ بوگ ءَ انت – اے گمزدگیں کھولانی سر ءَ یک وڑ ءَ جھنم ءِ ازان دور دیگ بوتگ –