روکپتی بلوچستان ءَ دگ ءِ وئیلاں زالبولے ءَ ھوار سَے مردم بیران ءُ بیست ءُ زدگ بیتگ اَنت

چِلَگی زالبولے دگ ءِ وئیل ءِ آماچ بیتگ ءُ چریشی ءَ آ لاپُری ءِ وھد ءَ بیران، دمگاں شریں آسراتی ءِ نہ بیگ ءَ گوستگیں سال ءَ یازدہ زالبول سر ءِ چُک ءَ بیران بیتگ اَنت – بلوچ کمپعن فالعین

سر بیتگیں ھالانی رد ءَ روکپتی بلوچستان ءِ دمگ جیرفت ءَ چِلگی زالبولے دگ ءِ وئیل ءَ بیران بیتگ –

زالبول ایمبولینس ءَ بیتگ ءُ ایمبولینس ءِ انتزامیہ ءِ گوشگ اِنت کرمان شھر ءَ پنچ میل گستا یک سواری گاڑی ءَ ایمبولینس ءِ میان ءَ وئیل بیتگ ءُ چریشی ءَ ایمبولینس ءَ سواریں چِلگی زالبول بیران بیتگ –

بلوچ کمپعن فعالین ءِ گوشگ اِنت کہ گوستگیں سال ءَ یازدہ چِلگی زالبول سر ءِ چک ءَ بیران بیتگ کہ آ جتا جتائیں آسراتیانی نہ رسگ ءِ سوب ءَ بیران بیتگ اَنت –

ھمے وڑ ءَ ھاش ءَ دیم پہ دزاپ ءَ رؤکیں گاڑی ءِ دگ ءِ وئیل ءِ آماچ بیتگ ءُ چریشی ءَ دو مردم بیران ءُ بیست ءُ دو زدگ بیتگ اَنت –

گیشیں ھالانی رد ءَ وئیل ھاش ءُ دزاپ ءِ میان ءَ بیتگ کہ گاڑی ءَ اوگستان ءِ جھمنندیں مردم سوار بیتگ اَنت –

روکپتی بلوچستان ءَ ھمک روچ دگ ءِ وئیلاں بازیں کچے ءَ مردم بیران ءُ زدگیانی ھال چاگردی رسانکجاھاں پیداک اَنت ءُ سرکار ءِ نیمگ ءَ تنی وھدی مزنیں گامگیج گندگ ءَ آیگ ءَ نہ اَنت –