نبشتانک: من جنگ کن آں
نبشتہ کار: ڈاکٹر مھروان بلوچ
دی بلوچستان پوسٹ
من باز اجکہ ءُ ھیران آں کہ رستر منی زمین ئے سرا کیت ءُ پدا منءَ گش ایت کہ تو جنگلی یے تو وھشی یے تو زالم ئِے تو دہشتگردءِ ئے، تو ملک ءَ پروشگ ءِ پندل سازگ ءَ ئے، اجب نہ اِنت گندے؟-
پد ءَ ترا بیگواہ کنت، زندان ءَ بندیگ کنت، بےکساس سزا دنت ءُ گڈی ءَ کُشیت ءُ چگل دنت ءُ انگت پدا من ءَ میاریگ کنت، اجب نہ اِنت گندے؟-
ایشاں چی ابید، رستر زواکی ءِ پلہ مرزی ءَ منی گُلزمین ءَ پول ایت، منی مڈیاں پول ایت، منی مردماں پول ایت؟ گڑا انگت من ھاموش بہ باں؟-
ناں من ھاموش نباں گڑا تو چون کن ئے؟ گڑا من جنگ کن آں، دانکہ من ساہ زورگ ءَ آں، من جنّگ کن آں دانکہ من ءَ وتی گلامی سما بیت، من جنگ کن آں دانکہ منی مردم بیگواہ ءُ کُشگ بنت، من جنگ کن آں دانکہ منی زبان، ربیدگ ءُ مڈی ھترہ ءِ آماچ بیت، من جنگ کن آں دانکہ منی چار دیواری کم شرپ کنگ بیت، من جنگ کن آں۔
بلے ھژدری نہ انت کہ منی ھمبل ءُ ازیز سرپد بہ بنت کہ من پہ وتن جنّگ کتگ ءُ من پہ گلزمین ءِ ھاترا شھید بوتگ آں، بلکیں ایوکہءَ منی مٖڈی ءِ ھاک پوہ بہ بیت کہ من آئی ءِ ھاترا ھون ریتکگ اَنت، دانکہ گلیں وتن من ءَ بزدلی ءُ چم جلی ءِ شگان مجنت ءُ مہ گوش ایت کہ تئی مات ءِ دل بند ئے سر ءَ رستر ءَ جاہ کت ءَ بوتگ بلے تو لگور بوتگ ئے؟ تو بے سُد بوتگ ئے؟ تو بےھس بوتگ ئے؟
من ھمے ھیالانی زرا چول ورگءِ ات آں، منی ساہ بند بوہگ ءَ اَت من زور جت ءُ دراجیں ساہ ئِے زُرت ءُ پد ءَ منءَ سما بوت کہ جنگءَ چے ابید، دگے ھچ پش نکپتگ، پمیشکہ من گوں رستر ءِ ھلاپ ءَ جنگ ءِ جار ءَ جن آں من گوں رستر ءَ جنگ کن آں، ھو من گوں رستر ءَ جنّگ کن آں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔