بلوچستان: گوستگیں بیست ءُ چار ادارانی تہ ءَ پوجی لشکری کشیانی میان ءَ 8 مردم بیگواہ، 2 کُشگ بیتگ اَنت

بیگواھیں مردم ھاران، تربت، تمپ ءُ کوھلو ءَ پوجی لشکر کشیانی میان ءُ پیش اتکگ اَنت ، تمپ ءُ پوجی آپریشن ءِ میان ءَ آوار جنگ بیتگیں یک کسے یلہ بیتگ –

سر بیتگیں ھالانی رد ءَ گوستگیں شپ ءِ ساھت سَے ءَ کبدانی محلہ ھاران ءَ فرنٹیئر کور ءُ اسپیت پوشیں کارمنداں دو مردم دزگیر کرتگ ءُ ناشناسیں زندناں برتگ اَنت –

دمگی مردمانی رد ءَ کبدانی میتگ ھاران ءَ ھاپز عزیز مسیت ءِ نزیک ءَ غلام کبدانی ءِ لوگ ءَ پوجی کارمنداں بیڑ برتگ ءُ آئی ءِ ورنائیں بچ بابا کبدانی دزگیر کرتگ، بابا کبدانی درزی ءِ کار ءَ اِنت –

اشی ءَ ابید کبدانی میتگ ءَ کریم بکش کبدانی ءِ لوگ ءَ ھم پوجی کارمنداں بیڑ برتگ ءُ آئی ءِ ورنائیں بچ مھر اللہ کبدانی بیگواہ کرتگ –

مھر اللہ کبدانی گوستگیں ھپتگ ءَ ھاران ءَ بیگواہ بیتگیں عمران کبدانی ءِ برات اِنت کہ آ پوج ءَ آوار جتگ ءُ برتگ – دمگی مردمانی رد ءَ گوستگیں شپ ءَ پوجی کارمنداں لوگ ءَ جاڑیگیں زالبول ءُ چُک ھم لَٹ شاپ کرتگ اَنت –

ھمے رنگ ءَ تربت ءَ پاکستانی پوج ءَ دو ورناہ آوار جتگ ءُ برتگ اَنت – ورنایانی پجار سھیل ء رفیق ءُ فیصل ء علی مھمد ءِ ناماں زانگ بیتگ اَنت –

دمگی مردمانی رد ءَ گاریں ورناہ شکار ءِ واستا شتگ بیتگ اَنت کہ اود ءَ پاکستانی پوج ءَ دزگیر کرتگ ءُ بیگواہ کرتگ اَنت کہ چریشی ءَ پد آیانی ھچ ھال نیست اِنت –

ھمے رنگ ءَ گوستگیں روچ ءَ تمپ ءَ پاکستانی پوج ءَ بیڑ برتگ ءُ سَے کس آوار جتگ ءُ برتگ اَنت –

گیشیں ھالانی رد ءَ تمپ کلاھو ءَ شھید ھامد بلوچ ءِ لوگ ءَ پوج ءَ بیڑ برتگ ءُ اود ءَ ھامد ءِ دو چکاں ھوار سَے کس آوار جتگ ءُ برتگ اَنت –

آوار جنگ بیتگیں مردمانی پجار طاھر ء ھامد ءُ بیبگر ءِ ھامد ءُ سمیر ء امیر ءِ ناماں زانگ بیتگ اَنت- دمگی مردمانی رد ءَ اشانی تہ ءَ بیبگر مروچی سھب ءَ یلہ کنگ بیتگ ءُ آ دوئیں انگت ءَ بیگواہ اَنت –

ھمے رنگ ءَ گوستگیں روچ ےَ کاھان ءَ پوج ءَ لشکر کشی بندات کرتگ کہ اود ءَ کوڈی پیشی ءَ پوجی کارمنداں تیرگواری کرتگ ءُ دو مردم کُشتگ ءُ یکے زدگ کرتگ –

بیران بیتگیں مردمانی پجار جندو ءُ ولی داد ءِ ناماں زانگ بیتگ اَنت، وھدیکہ زدگ بیتگینے پجار غلائند ء جندو ءِ نام ءَ زانگ بیتگ –

دمگی مردمانی رد ءَ پوجی کارمنداں زدگ بیتگیں مردم آئی ءِ ناکو زتک ءِ ھمراھی ءَ دزگیر کرتگ ءُ ناشناسیں زنداناں برتگ اَنت –

زانگ بہ بیت بلوچستان ءَ پوجی لشکر کشی ءُ مردمانی آوار جنیانی تہ ءَ گیشی اتکگ ءُ سیاسی مردمانی گوشگ اِنت کہ بلوچستان ءَ سرکار ءَ مردمانی یل کنگ ءِ زبان کرتگ بلے یک نیمگے ءَ کمے مردم یل بیگ ءُ دوسری گرگ ءُ گار کنگ بیگ ءَ اَنت –