گوادر ءَ نوکیں بالی پٹ ءِ سر ءَ اُرش، اُرش ءِ زمہ واری بی ایل ایف ءَ منّ اِتگ

گوادر ءَ نوک جوڑ بؤکیں انٹرنیشنل بالی پٹ ءِ سر ءَ بی ایم 12 گولھاں گوں اُُرش کتگ جانی مالی تاوان داتگ – میجر گْوھرام بلوچ

سربوتگیں ھالانی رِد ءَ بلوچستان ءِ تیاب دپی دمگ گوادر ءَ ناشناسیں سلاہ بندیں مردماں نوک جوڑ بؤکیں بالی پٹ ءِ سر ءَ بی ایم 12 گولھانی سر ءَ اُرش کتگ-

ھمے گوشگ بوگ ءَ انت بی ایم 12 گولہ بالی پٹ ءِ تہ ءَ کپتگ انت ءُ چریشی ءَ جانی مالی تاوان رس اتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ گوادر ءَ نوک جوڑ بؤکیں انٹر نیشنل بالی پٹ سر ءَ بوتگیں اُرش ءِ زمّہ واری منّ اِتگ گوشتگ کہ مئے سرمچاراں آدینگ ءِ بیگاہ ءِ ادار شش ءَ گوادر ءِ دمگ گرانڈانی ءَ نوک جوڑ بؤکیں انٹرنیشنل بالی پٹ سر ءَ دو بی ایم 12 گولہ آس داتگ، کہ کنسٹرکشن نیمگ ءَ کپتگ انت –

جارکش گْوھرام بلوچ ءَ گوشتگ اُرش ءِ وھد ادار شش ءَ ھمے ھاتر ءَ گچین کُرتگ کہ درسیں کارندہ ءُ پھازگی کارمند یکجاہ بنت ءُ وتی کواٹراں رؤگے تیاری ءَ کن انت – اے اُرش ءَ زورگیریں سامراجی تاکتاں مزنیں کساسے ءَ جانی ءُ مالی تاوان رس اتگ –

آئی دیمتر ءَ گوشتگ کہ اے شوربندی چین ءُ پاکستان ءِ یکجاھیں لوٹ سی پیک ءِ بھرے -بید ء چہ بلوچ راج ءِ مرزی ءُ منشاء اے شوربندیانی بگیری ءَ بلوچستان لبریشن فرنٹ وتی اُرشاں برجاہ داریت –

گڈسر ءَ میجر گْوھرام بلوچ ءَ گوشتگ کہ زورگیریں پوج ءُ اے وڑیں سامراجی بند ءُ ساچیانی سر ءَ اُرش ایردستیں بلوچستان ءِ آجوئی ءَ تاں برجاہ مان انت –