ھزدار ءَ ریاستی چاریگ ءِ سر ءَ اُرش، اُرش ءِ زمّہ واری بی ایل اے ءَ منّ اِتگ

ھزدار ءَ پاکستانی پوج ءِ چاریگ ءِ گِس ءِ سر ءَ بوتگیں دستی بمب اُرش ءِ زمّہ واری ءَ منیں- جئیند بلوچ

سربوتگیں ھالانی رِد ءَ گوستگیں شپ ءَ ناشناسیں مردماں ھزدار ءَ صادق احمد گزگی ءِ گِس ءِ سر ءَ دستی بمب اُرش ءِ کتگ – اُرش ءَ ھچ وڑیں جانی تاوان ءِ ھال نیست، ناشناسیں مردم در آیگ ءُ رؤگ ءَ سوبین بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں ھزدار ءَ زورگیریں پاکستانی پوج ءِ چاریگ صادق احمد گزگی ءِ گِس ءِ سر ءَ دستی بمب اُرشے کُتگ –

جارکش ءَ گوشتگ کہ اے مرد گوستگیں بازیں وھداں زورگیریں پاکستانی پوج ءِ گوشگے پد ءَ بلوچ راجی زرمبشت ءِ بگیری ءَ کار کنگ ءَ انت –

آئی ءَ گوشتگ کہ بلوچ لبریشن آرمی ءِ مدامی ھمے جھد انت کہ بلوچ راجی آجوئی ءِ اے جنگ ءَ بلوچ راج اے تاواناں چہ پھریزگ بہ بنت، بلے اگاں یک بلوچ ءِ زورگیریں دژمن ءَ ھوار بیت ءُ راجی دلار جوڑ بیت وتی کار ءُ کِرداں راج ءُ راجی زرمبشت ءَ تاوان دیگ انت گڑا اے وڑیں مردم ءَ بس بلوچ بوگ ءَ بکشگ نہ بیت – اے وڑیں راج دژمناں آھانی کُشگ ءَ پیش مکن کنگ بیت ءُ آھانی اُرش ترندی کم کنگ بیت تانکہ آ وتی کرد ءِ سر ءَ چار بچار بہ کنت ءُ وتی تہ ءَ بدلی بیاریت، اگاں آئی ءَ وتی تہ ءَ بدلی نیاؤرت گڑا اُرشانی تہ ءَ ترندی گیش کنگ بیت –