نبشتانک: مھر چو نود ءٙ باتن ءٙ شنزایت
نبشتہ کار : نثاریوسف
دی بلوچستان پوسٹ
قدیر ساگر ءِ شعرانی کتاب ” مھر چو نود ءٙ باتن ءٙ شنزیت کہ ہمے زیتّاں چاپ ءُ شنگ بیتگ کتاب ءِ وانگ ءٙ پد من ءٙ دل ءٙ سکین دات کہ من چوشیں ارزشت داریں کتابے ءِ سر ءَ الم ءٙ چیزے نہ چیزے نبشتہ بہ کناں کہ اے وڑیں کتاب پہ بلوچی زبان ءُ لبزانک ءٙ گنج ءُ گیشی یے ودیگ کت کن اٙنت ، پہ آوکیں پد ریچ ءُ پہ آئندگیں اوبادگاں مادنیں راھے نشان دات کن اٙنت ۔
قدیر ساگر 14، جولائی 1989 ءٙ ماں میتاپیں مند ءِ ہنکین بُلّو ءٙ واجہ محمد رحیم ءِ لوگ ءٙ ودی بیت ، قدیر ساگر ءِ واجہیں کماش پہ کار ءُ روزگار ءِ حساب ءٙ بُلّو ءِ وانگ جاہ ءٙ یک اُستادے ءِ بستار ءٙ وتی ذمہ واری ءٙ پیلو کنگ ءٙ اٙت بلے اسل ءٙ ، آ ہمے وانگ جاہ ءِ مُھر ءُ محکم کنوک اٙت ءُ وتی ہمے مقصد ءٙ پہ ایمانداری ءُ دل پہکی ءٙ دیم ءٙ بران اٙت ، آئی ءٙ وتی دور ءُ زمانگ ءٙ بلّو ءِ وڑیں پد منتگیں میتگے ءٙ قابل قدریں وانگ ءُ زانگی چاگردے جوڑ کتگ اٙت ، اے وڑیں ھزمت پہ آئندگ ءُ نوکیں پدریچ ءٙ لائقِ گیر آرگ اٙنت ، آئی ءٙ پہ وانگ ءٙ ، ءُ پہ وانینگ ءٙ یک عجب رنگیں مہر ءُ شئیدائی یے گون اٙت ۔
اے قدیر ساگر ءِ وش بھتی اِنت کہ آ ، واجہ محمد رحیم ءِ وڑیں وانندہ ءُ سرپدیں انسانے ءِ نیاد ءُ دلگوش داری ءِ ساھگ رُست ءُ مزن بیت ، ءُ ھمائی ءٙ چہ تمیز ءُ تربیت ئِے ہیل گِپت ءُ وتی شرّ ءُ گندگ ءٙ سرپد ءُ زانتکار بیت آئی ءٙ وتی بنداتی وانگ چہ ہائی سکول بُلّو ءٙ در بُرت ءُ پہ گریجویشن ءٙ تربت کیچ ءٙ شُت ہمود ءٙ چہ عطاشاد ڈگری کالج ءٙ وتی وانگ ءِ توام کت ، سن 2014 ءٙ بلوچستان ءِ جاورانی ناگیگی ءِ سوّب ءٙ در مُلک ءُ دراں ڈیھ بیت ۔
قدیر ساگر بلوچی لبزانک ءِ پڑ ءٙ شاعرے ءِ جہت ءٙ زانگ بیت مھر چو نود ءٙ باتن ءٙ شنز ایت آئی ءِ شعرانی اولمی کتاب ءِ نام اِنت کہ گوستگیں ماہ ءٙ بہ زاں جنوری 2021 ءٙ چہ قاسم لبزانکی مجلس مند بلو ءِ نیمگ ءٙ چاپ ءُ شِنگ بیتگ ، کتاب ءِ سرتاک مزن نامیں آرٹسٹ بانک سیما سردارزئی ءٙ جوڑ کتگ ، بانک سیما سردار زئی چندے چما وش بھتیں بلوچ آرٹسٹان اِنت کہ آ ، ہچ وڑیں ستا ءُ ساڑایگ ءِ واز مندگ نہ اِنت آھانی کرد ءُ کمال وت ھبر کن انت ، پہ گالسنجی ءٙ واجہ ایم شکاری ءِ نام نبشتہ اِنت کہ آئی ہوں گوں وتی اِزم ءٙ گوں حق ءُ انصاف کتگ ، نامدات ، قدیر ساگر ءِ قبلہیں کماش ءُ نمیرانیں اُستاد واجہ محمد رحیم ءِ نام ءٙ اِنت کہ پہ وتی آریپ ءٙ آئی ءِ نیکیں واھگاں سھر ءَ ئے کنت ، کتاب ءِ توامیں حقّ ءُ مُز قاسم لبزانکی مجلس ءِ واک ءُ اکتیار ءٙ اٙنت ، پہ مزنی ءِ حساب ءٙ کتاب درستی 172 تکدیم چاگرد کنت ءُ تکینکی رہبند ءِ رد ءٙ کتاب ءِ لڑ ءٙ یک پاک ساڑاے ،68 دستونک ، 26 لچہ، 5, چاربند ، ءُ 4 سانیٹ ماں گیجگ بیتگ کہ جتا جتائیں وھد ءُ مُوسماں دگہ دگہ ھند ءُ ولائتاں نبشتہ کنگ بیتگ انت ، پیشگال نبشتہ کنوکانی تہا ہر دل عزیزیں شاعر منظور بسمل ، نامی ایں بلوچ آزمانکار ڈاکٹر ناگمان ، وش گُپتاریں عزّت ابدال ، بلوچی ءِ سنگین ھیالیں شاعر ءُ ردانک نویس عارف وفا ءُ ورنا پکریں جبّار آسکانی ءِ نام ہواراٙنت کہ قدیر ساگر ءِ زند ءُ ازم ءِ بابت ءٙ پہ نیک نیّتی وتی ھیال ءُ لیکہ اِش درشان کتگ اٙنت ، کرزاٙنت کہ کسے بوانیت اِش ، قدیر ساگر ءِ شاعری یک ہنچیں دلے ئے درد اِنت کہ جتگ ءُ تہہ پروش کنگ بیتگ ، ءُ چرآئی ءٙ چہ آئی ءِ زند ءِ ہر متاع ءُ مھر پلُگ بیتگ ، آ، آزردگ ءُ ارمانی اِنت بلئے گریت نہ کنت اندر اندرا وت ءٙ وران اِنت ، کُہت ءُ بژنیگ انت ، پہ رفتگیں مُرادانی اوماناں ھسکیت ءُ آہ سرد کنت-
دُور ءٙ چہ ، واھگانی چراگے درا نہ بیت
تُرسے رجان اِنت تہنا دلاں ہنچیں سیہ شپے
ساگر کُجام دیم ءَ نی جُنزّئے گوں تراولاں
بے اوستی ءِ گیابیں ءُ دروھاپیں ساھگے
یا
آپ پُشت ءٙ اِن ءُ دیم ءٙ آسے
نزّ من سرجمیں دُنیا آسے
چو مہ بیت تو منی برانزاں بہ سُچ ئے
سُتکگیں اے دل ءِ کسّہ آسے
جی پہ مِسکیں وطن ءِ ھشکیں دار
اوھے پردیس کہ ، پہ مّا ، آسے
اللّہ ءِ میارئے
بلوچستان سبزبات ءُ بلوچی میزراں بات آمین-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔