بلوچستان ءَ جتا جتائیں وئیلاں دومردم بیران ءُ دوازدہ مردم ٹپی

سربوتگیں ھالانی رِد ءَ بلوچستان ءِ دمگ شال ءُ ھرنائی ءَ تیر گواری وئیلاں سَے مردم ٹپی بیتگ ءُ شال لکپاس ءُ نوشکے ءَ دگ ءِ وئیلاں کسانیں زھگے بیران ءُ نہ مردم ٹپی بوتگ اَنت، وھدیکہ ھزدار ءَ گروک ءِ کپگ ءَ ورنایے بیران بوتگ-

گیشیں ھالانی رِد ءَ بلوچستان ءِ بنجاھی شھر شال ءِ رودراتکی شھدگ ءَ وت ما وتی جنگ ءُ چوپ ءَ تیرگواری ءَ چہ یک مردمے ٹپی بوتگ –
ٹپی بوتگیں مردم ءِ پجار امین اللہ ء اسد اللہ ءِ نام ءَ چہ بوتگ – دمگی پولیس ءَ ٹپی بوتگیں مردم شال ءِ نادراھجاہ ءَ سرکتگ اے درگت ءَ گیشیں پٹ ءُ پول کنگ انت –

ھمے وڑ ھرنائی ءَ ناشناسیں مردمانی تیرگواری ءَ دو مردم ٹپی بوتگ اَنت –

ھالکارانی رِد ءَ شمبے شپ ءَ ہرنائی شھدگ ءِ سر ءَ ناشناسیں مردمانی تیرگواری ءَ سخی داد ءُ خان محمد ٹپی بوتگ انت –

ریسکیو ٹپی بوتگیں مردم دست گپتگ ءُ نادراھجاہ ءَ سرکتگ انت -اے درگت ءَ ٹپی بوتگیں مردمانی گوشگ اِنت کہ ما شپ ءِ وھد ءَ اشکرانی کھن ءَ کارکنگ ءَ پد واتر گس ءَ روگ ءَ بیتگیں کہ اوسی شیلہ ءِ نزیک ءَ سلاہ بندیں مردماں مارا داشتگ ءُ سامانانی دیگ ءِ گْوشتگ گڑا ھمے میان ءَ ما یک سلاہ بندے گیپتگ کہ دومی سلاہ بند ءَ وتی ھمراہ ءِ رکینگ ءَ مئےسر ءَ تیرگْواری کُرتگ ءُ تتکگ انت-

ھمے وڑ بلوچستان ءَ جتا جتائیں دگ ءِ وئیلاں کسانیں زھگے بیران بوتگ ءُ نُہ مردم ٹپی بوتگ اَنت –

ھالانی رِد ءَ گوستگیں روچ شال ءِ دمگ لکپاس ءِ نزیک ءَ ویگو گاڑی ءِ چپی بوگ ءَ پنچ مردم ٹپی بوتگ اَنت – ٹپی بوتگیں مردمانی تہ ءَ چُک زالبول ھم ھوار انت، ٹپی بوتگیں مردم شیخ رشید ھسپتال ءَ سر کنگ بوتگ انت –

ھمے وڑ ءَ نوشکی کیشنگی ءَ کلی ھیرزای اسٹاپ ءَ آرسی ڈی شھدگ ءِ سر ءَ مساپر چہ بس ءَ ایر کپگ ءَ بیتگ اَنت کہ دومی مساپر کوچ ءِ ڈیکر کنگ ءَ کسان سالیں زھگے بیران بوتگ آئی پجار نومان ء مھمد حسن مینگل جھمنند شال ءِ نام ءَ چہ بوتگ-

دگہ وئیلے آرسی ڈی شھدگ کیشنگی لیویز تانہ ءِ نزیک ءَ دیم ءَ اتکگ کہ پیلڈر گاڑی ءُ سینکلے ءَ ڈیک وارتگ – ڈک ورگے سوب ءَ سَے مردم ٹپی بوتگ اَنت –

وھدیکہ سیمی وئیل آرسی ڈی شھدگ ڈیڈار ءَ دیم ءَ اتکگ کہ مزدا گاڑی ءَ گوں موٹر سینکلے ءَ ڈیک وارتگ چریشی آسر ءَ یک مردمے ٹپی بوتگ ، وئیلاں ٹپی بوتگیں مردم نوشکے نادراھجاہ ءَ سرکنگ بوتگ اَنت۔ بیران بیتگیں زھگ جون ھژدری چار ءُ ٹپاس ءَ پد کھول ءِ دست ءَ دیگ بوتگ –

دومی نیمگ ءَ ھزدار ءِ دمگ خط کپر ءَ گرند ءُ گروک ءَ یک ورنایے گروک ءَ گپتگ ءُ بیران بوتگ وھدیکہ دہ پس ھم گروک ءَ گپتگ ءُ مُرتگ انت – بیران بوتگیں ورنایے پجار محمد الیاس ء ریاض احمد ءِ نام ءَ چہ بوتگ – ھمے گوشگ بوگ ءَ انت کہ محمد الیاس ھما وھد ءَ گروک ءِ شھم ءَ گپتگ کہ آ پسانی چارینگ ءَ بوتگ ھمے وھد ءَ آئی ءِ دہ پس ھم گروک ءِ شھم ءَ چہ مُرتگ انت –