کیچ ءَ پاکستانی پوج ءِ سر ءَ اُرش، اُرش ءِ زمّہ واری بی ایل اے ءَ منّ اِتگ

آبسر ءَ پاکستانی پوج ءِ سر ءَ دز بمب اُرشے کُتگ ءُ جانی ءُ مالی تاوان داتگ – جئیند بلوچ

سربوتگیں ھالانی رِد ءَ ناشناسیں مردماں کیچ ءِ بُنجاھی شھر تربت ءِ دمگ آپسر ءَ سرپراز میڈیکل اسٹور ءِ نزیک ءَ پاکستانی پوج ءِ کاروان ءِ یک گاڑی ءِ سر ءَ دز بمب اُرشے کتگ-
اُرش ءِ آسر ءَ پاکستانی پوج ءَ جانی ءُ مالی تاوان رس اِتگ ناشناسیں مردم درآیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں مروچی شمبے ءِ روچ ءَ تربت ءِ دمگ آپسر بازار ءَ زورگیریں پاکستانی پوج ءِ کاروان ءَ ھواریں یک گاڑی ءِ سر ءَ ھما وھد ءَ دز بمب اُرشے کتگ کہ آ تر ءُ گرد ءَ بوتگ اَنت-

آئی ءَ گوشتگ کہ اُرش ءِ آسر ءَ زورگیریں پوج ءَ جانی ءُ مالی تاوان رس اتگ-

گڈسر ءَ جارکش جیئند بلوچ ءَ وتی درشان ءِ تہ ءَ گوشتگ کہ ما یکرندے پد ءَ لس مھلوک ءَ مکن کن ایں کہ آ زورگیریں پاکستانی پوج ءُ آئی ءِ کُمکاراں چہ دور بہ بنت –