سبی ءُ ڈیرہ مراد جمالی ءَ دگ ءِ وئیلاں ھپت مردم ٹپی یکے بیران

سربیتگیں ھالانی رِد ءَ بلوچستان ءِ دمگ سبی نوتال ءَ چہ شال ءَ نواب شاہ ءَ رؤکیں گاڑی تیز روگ ءِ سوب ءَ چپی بوتگ، چپی بوگ ءِ سوب ءَ گاڑی ءِ ڈرائیور ءَ ھوار چار مردم ٹپی بوتگ اَنت –

ٹپی بوتگیں مردمانی پجار شیراز علی، تبصب علی، حماد علی ءُ نظر احمد جھمنند نواب شاہ ءِ ناماں چہ بوتگ انت – چار مردم دمگی نادراھجاہ ءَ سرکنگ بوتگ اود ءَ ٹپانی درمان کنگ ءَ پد پہ گیشیں دارو درمان ءِ ھاتر ءَ نواب شاہ ءَ دیم دیگ بوتگ انت –

ھمے وڑ ڈیرہ مراد جمالی ءَ نوتال ءِ نزیک ءَ پولیس ءِ گاڑی تیز روگ ءِ سْوب ءَ چپی بوتگ، چریشی ءَ چہ یک بندیگے بیران ءُ سَے پولیس کارمند ٹپی بوتگ اَنت-

نوتال پولیس ءَ بندیگ ھندی آمیدگس ءَ پیش کنگ ءَ پد واتر پولیس تانہ ءَ روگ ءَ بوتگ کہ تیز روگ ءِ سْوب ءَ گاڑی چپی بیتگ-

وئیل ءِ آسر ءَ بندیگ حبیب اللہ ء جان محمد گورشانی بیران بوتگ وھدیکہ سَے پولیس کارمند ڈرائیور وحید، علی بنگر ءُ نیاز علی رند سک زدگ بوتگ اَنت۔ پہ درمان کنگ ءَ نادراھجاہ ءَ سرکنگ بوتگ اَنت-