جاؤ ءَ پوجی پانگس ءِ سر ءَ اُرش، اُرش ءِ زمّہ واری بی ایل ایف ءَ منّ اِتگ

کوھڑو ءَ پاکستانی پوج ءِ بنجاھی پانگس ءِ سر ءَ راکٹ اُرشے کتگ چریشی ءَ پاکستانی پوج ءَ جانی ءُ مالی تاوان رس اتگ – میجر گْوھرام بلوچ

سربیتگیں ھالانی رِد ءَ گوستگیں روچ ءَ چار شمبے ءَ ناشناسیں مردماں آواران ءِ دمگ جاؤ ءَ پاکستانی پوج ءِ پانگس ءِ سر ءَ اُرش کُتگ –

اُرش جاؤ ءِ دمگ کوھڑو ءَ پوج ءِ بنجاھی پانگس ءِ سر ءَ کنگ بوتگ اُرش ءِ آسر ءَ پاکستانی پوج تاوان بار بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں چار شمبے ءِ شپ ءَ ادار ھشت ءَ آواران ءِ دمگ جھاؤ کوھڑو ءَ پاکستان آرمی ءِ بنجاھی پانگس ءِ سر ءَ راکٹ اُرشے کتگ کہ پانگس ءِ تہ ءَ کپتگ چریشی ءَ چہ پوج ءَ جانی ءُ مالی تاوان رس اتگ –

آئی ءَ گوَشتگ کہ اُرش ءَ پد پروش وارتگیں پاکستانی پوج ءَ مدامی ئیں وڑ ءَ لس مھلوک ءِ سر ءَ بیڑ برتگ ءُ لوگانی لُٹ ءُ پُل ءِ ھواری ءَ بازیں مردمے آوار جتگ ءُ بنجل ءَ برتگ –

گڈسر ءَ میجر گْوھرام بلوچ ءَ وتی درشان ءِ تہ ءَ گوشتگ کہ بلوچستان ءِ آجوئی تاں زورگیریں پوج ءِ سر ءَ مئے اُرش برجاہ مان انت –