نبشتانک: جدگال ءِ کدیمیں کبرستان
نبشتہ کار: اسد بلوچ
دی بلوچستان پوسٹ
چہ گوگدان ءَ روکپتی نیمگ جدگال ءِ ڈنّ ءَ کدیمیں کبرانی دمب ھست انت کہ گِندگ ءَ اِنچو کوْھن نہ انت بلے گوگدان ءَ جھمنندیں مردمانی یادداشت ءِ نہ انت چُرّک ءَ انچو کہ بُرز سِرکپ اِت جدگال ڈن ءِ راستیں دست ءَ انو کہ زونگ ءِ ٹاور مِکّ اِنت چہ ھمدا اے کبرستان بندات بیت تاں پراھیں توک ءَ ساری مزن دگّ (ڈی بلوچ M8) ءَ روت اے تک تیوگ ءَ کبرستان اِنت زی منی سنگت امران رزاک نادر اتکگ اَت تربت ءَ من ءَ گشت اش کہ من پہ ریسرچ ءَ اتکگ اوں کہ بلوچستان یونیورسٹی ءَ مں پی ایچ ڈی کنگ ءَ اوں ءُ منی ریسرچ مکران ءَ مرگ ءُ جنازہ ءِ درکدیمیں رسم ءُ دود ءُ کوْھن ءُ کدیمیں کبرانی سرا اِنت زی بیگہ ءِ ساھت 5 بج ءَ من ءُ امران گون سنگت زریپ زدگ ءَ جدگال ءِ کبرستان ءَ شت اِں شعیب شاداب ءَ مارا جاگہ ءِ سوج داتگ ات تاں ھو اود ءَ مزنین کساسے کبر ھست ات، بازیں کبر انگہ ھست ءُ سلامت باز پُرشتگ زمین ءَ ھمدپ بوتگ ات۔
چہ اشاں لھتیں کبر پراہ ات لھتیں دراج ات، گیشتر ءِ دیم ماں ھکّ ءَ ات بلے لھتیں انچیں کبر ھم ھست کہ دیمے ماں ھکّ نہ انت۔ اے پئیمیں کبر دو ءُ سے ءَ گیش نہ اَنت یک انچیں کبرے ھم ھست کہ چپّ ءُ چاگرد بزاں گول گول ءَ سنگانی تہ ءَ اَنت انچش کہ مئے زمانگ ءَ بازیں کبر پسیل ءُ چار دیواریاں بند انت بوت کنت اے کبر ھمے وڈ نشان کنگ بوتگ کبرانی سر ءَ مکّیں سنگ جُھل کلّ انت کہ سُرینگ ھم نہ بنت لھتیں کسانیں کبر انت گمان بیت گوْنڈوِی کبر انت۔
ڈی بلوچ کمپنی ءُ ایف سی ءِ گاڈیانی روّا ءَ باز کبر ڈُرْاتگ بازین کبرے ایف سی ءِ بُنجل (چیک پوسٹ) ءِ چیرا بار گپتگ
اے کبرستان ءِ بابت ءَ گوگدان ءِ مردمان ھچ سرپدی نیست مردم گش انت کہ اے چہ ما باز ساری ءِ کبر انت منی وتی گمان ھمیش اِنت کہ اے پنچ ءُ شش سد سال کوْھن ءُ کدیمیں کبر بنت-
گوگدان ءِ مھلوک چد ءُ ساری مچکدگ ءَ آباد بوتگ انت کہ نامے چُرّک بوتگ. گوگدان ءِ نوکیں آبادی ءَ کساس سد تاں سد ءُ پنجاہ سال بیت کہ ھمدا نشتگ انت اگان اشاں سد ءُ پنجاہ سال بکن ءُ مچکدگ ءِ تہ ءَ نشتگیں کدیمیں مردماں دو سد دو سد ءُ پنجاہ سال بکن اے وت چار سد سال بنت جدگال ءِ کبرستان اے دراھیں مردمانی ھوش ءُ گیران ساری ئیگ اِنت۔
اگاں چہ جدگال ءِ کبرستان پنچ ءُ شش سد سال یا کمو کم یا گیش ءِ زمانگی کبرستانے بلے کبرانی چارگ ءُ گِندگ ءَ زاھر ھمے بیت کہ 40 ءُ پنجاہ سالی کبر انت۔
اے بابت ءَ ھچ مالوم داری نیست کہ اے چونیں مردم بوتگ انت، وت مرتگ انت یا جنگ ءُ جدلے ءَ گپتگ ءُ کشتگ انت کجام دور ءُ زمانگ ءِ مردم انت کس ھچ نہ زانت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔