نبشتانک: چیئرمین زاھد بلوچ
نبشتہ کار : سرباز وپاؔ
دی بلوچستان پوسٹ
من گوں نبشتہ کنگ ءِ بندات ءَ ھزار رند ءَ واجہ ھُدا ءِ شُکر ءُ منت ءَ گِراں کہ من انچین اَھدے ءَ زندگاں اے اَھد منی بلوچ راجدپتر ءِ گرانکدریں اَھدے زانگ بیت چی ءَ کہ اے اَھد ھر بلوچ ءَ چکاسگ ءَ اِنت آئی ءِ کردار ءَ جتا نبیسگ ءَ اِنت مئے آؤکیں پدریچ مئے کسہ ءَ کتابانی تہ ءَ گند ایت ءُ وان ایت ، بلے من ھمے اَھد ءَ زندگی کنگ ءَ آں ھو اے گپ راستے کہ اے پہ بلوچ راج ءَ سکیں گران ءُ دردناکیں اَھدے زانگ بیت ایشی ءِ تہ ءَ شھیدی ، بیگواھی در پہ دری گون اِنت، بلے ایشی ءِ مستریں شری ھمیش اِنت ھر شے ءَ جتا جتا گیشین اِیت ءُ نامے دنت اے اَھد مارا ھمک رنگیں ندارگ پیشدارگ ءَ اِنت گَم ءُ وشی ، درد ءُ مھر ، در پہ دری ءُ بے گسی ، دوستی ءُ دُژمنی ، ھمک ندارگ ءَ یک جتائیں مارشتے دنت ھمے اَھد ءَ شیر ءُ آپ گیشینتگ ءُ مارا پیشداشتگ۔ اے اَھد ءَ لکاں راجی راجی بامرد جوڑ کرتگ ، راجی دلّار ھم دیم ءَ آؤتگ الّم اے پہ بلوچ ءَ گرانیں اَھدے ، بلے ھرکسی کِردار ءَ گوں جتائیں ناماں سمبھین اِیت ۔
اے ھما اَھد اِنت کہ بلوچ ءِ ھمک تَب ءِ مردم پہ آجوئی جنگ ءِ ھاتر ءَ پاد آتکگ ءُ جنگ کنگ ءَ اِنت ءُ بازینے شھید بوتگ چہ بلوچ ءِ آجوئی جُھد ءَ ھواریں جُھدکار باسک ءُ سِپائی ءَ بگر داں داں کماندار ءُ رھشون ءَ ھوار لَس مھلوک شھید کنگ بوتگ ، ھمک لیکہ ءِ مردم دُژمن ءِ دست ءَ بیگواہ کنگ بوتگ اے ھما اَھد اِنت کہ ایشی ءِ تہ ءَ مئے کسانسالیں بچ ءَ بگر داں پیرمرداں بیا ، مئے کسانسالیں جنک ءَ بگر داں مئے شیرزالیں پیریں ماس ھمے جُھد ءُ کربانی بھر بوتگ اَنت من ھمے کلیں چیزاں گون وتی چماں گندگ ءَ آں۔
منی مستریں وش بھتی ھمیش اِنت کہ من بلوچ راج ءِ لھتیں راجی بامردیں رھشون وتی چمان دیستگ۔ اے ھم واجہ ھُدا ءِ شکر اِنت من ءَ آھانی گندگ نیسب بوتگ۔ چہ ھمے رھشوناں یکّے چیئرمین زاہد اِنت انگت دُژمن ءِ دست ءَ بیگواہ اِنت اے وھد ءَ کہ من کلم چِست کرتگ ءُ پہ چیئرمین زاھد بلوچ ءَ چار پُرشتگیں لبز نبشتہ کنگ ءَ آں ، بلکیں آ انچیں کوھیں کردارے ءِ ھُدابُند اِنت ۔ بلوچ ءِ زھگ زھگ شریں وڑے ءَ زانت ءُ سرپد اِنت ، چیئرمین زاھد بلوچ کے اِنت ؟ منی نبشتہ کنگ مول ءُ مراد ھمیش اِنت ، من چون دیستگ ھما لھتین یات اَنت من آھاں نبشتہ کنگ لوٹ آں چیئرمین زاھد بلوچ وتی تہ ءَ یک شھدربر جاھے ، اِلم ءُ زانت ءِ یک دریایے۔ آ گوں گلزمین ءُ راج ءِ مھبت ءَ ھوار آ یک کتاب اِشکیں مردمے۔
وھدے کہ من دو ھزار سینزدہ ءَ داں دوھزار چاردہ ءِ اولسر ءَ گوں آئی ءَ ھوار اِت آں آئی ءِ ھمک گپ چہ کتاب ءَ بندات اَت ءُ داں کتاب ءَ ھلاس بوت آ وھدے گوں سنگتاں راجکاری ءُ راجدپترانی سر ءَ گپ ءُ تران کنگ ءَ بوتیں ، گڑا ھمے گپ اَلّم گوشتگ اَت ئِے پلان کتاب ءَ بہ وان ترا گیشتر سرپد کنت آئی ءِ مدام گپ ھمیش اَت کتاب بہ وان اِت ، کتاب شمئے رہبری ءَ کنت کتاب ترا زندگ بوگ ءِ راھاں پیشداریت گوں کتاب ءَ مھر بکن اِت ، کتاب ترا تئی جند ءَ سرپد کنت ، کتاب ترا تئی جُھد ءَ سرپد کنت ، کتاب تئی تہ ءَ زانت ءُ زانگ ودی کنت اَبید زانت ءَ مردم ناسرجم اِنت چوناھا آئی کجام وھد ءَ سنگتے بہ دیستیں ھمے جُستے اَلّم کرتگ اَت سنگت تو چے ونتگ یا تو چے وانگ ءَ ئے ۔
من ءَ یات اِنت کہ ما گوں چیئرمین زاھد بلوچ ءَ جاگھے نشتگ اَت ایں آ پاد آتک ءُ نزیکیں جاھے ءَ شُت ءُ پد ءَ زوت آتک۔ ما نشتگیں کلیں سنگت ھاموش اَت ایں ، دمانے پد گوش اِیت سنگتاں شما کُل ھاموش اِت دگہ گپ ءُ دیوانے ءَ نہ اِت ، بھتاوراں شما انچو کتاب ءِ تہ ءَ وتی وھد ءَ پرچا مُپت ءَ زوال کن اِت ، چہ ھشکیں نندگ ءُ بے تواری ءَ شما کتاب بہ وان اِت چہ کتاب ءِ چارگ ءَ الّم چیزے نہ چیزے دربر اِت ۔
یکروچے ما نشتگ اَت ایں مارا چیئرمین زاھد یک یک ءَ جُست کنگ ءَ اَت تو چے ونتگ ؟ کجام کتاب ءَ وانگ ءَ ئے؟ ، یا پرچا نہ وان ئے ؟ مئے دیوان ءَ یک سنگتے ءَ گوشت واجہ اے گلامی ءَ مارا وانگجاہ ءَ وانگ ءَ نہ اشتگ من چیزے بہ وان آں چیئرمین زاھد گوش اِیت سنگت تئی کیسگ ءِ کلم ءَ گنداں من اے گپ ءَ سرپد باں تو چیزے زان ئے سنگت ءَ گوشت جی ھو واجہ منی وانگ ھمینچُک اِنت من نامے نبشتہ بکن آں ءُ نام ءِ بہ وان آں من وانگ ءِ وھد ءَ سَے تبک ونتگ پہ منی وڑیں مردمے ءَ اے وڑیں کتاب ءِ وانگ ءُ دربرگ سک گران اِنت چیئرمین زاھد کند ات ءُ گوشت سنگت تئی بُنکی وانگ ھمیش اِنت کہ تو دربرتگ اے کتابانی تہ ءَ ھمے نام اَنت نبشتہ اَنت اگاں تو چنچو وان ئے گیشتر دربُرت کن ئے ، اے وڑ ءَ کہ تو نا اُمیت بہ بہ ئے گڑا تئی ھمے دربرتگیں لبز گار بنت تھنا وانگجاہ ءَ چہ مردم اِلم دربرت نہ کنت ، اِلم ترا چہ کتاباں دست کپ اِیت ۔ گوں کتاباں مھر ءُ نزیکی بکن ۔
اگاں من ءَ کسے جُست بہ کنت چیئرمین زاھد ءَ تو چون زان ئے ؟ منی پسہ ھمیش بیت چیئرمین زاھد یک اِلمے ءِ نام اِنت ، ھما اِلم کہ انسان دوستی ءِ درس ءَ دنت ھما الم مردم ءَ راجدوستی درس ءَ دنت ھما اِلم کہ پہ بلوچ راج ءِ وشین باندات ءِ دیمروئی ءَ گوں بندوک اِنت ، راج ءِ رھشونی ءَ کنت۔ ھما اَلم کہ مرچی بلوچ راج ءِ تہ ءَ جتا جتائیں نام ءُ شریں کِردار ودی کنگ ءَ اِنت ۔
ھو!اے گپ راستے کہ چیئرمین زاھد ءَ زورگیریں دُژمن ءَ چہ بلوچ راج ءِ دیم ءَ بیگواہ کرتگ۔ مرچی آئی ءِ بیگواھی ءَ ھپت سال سرجم بوتگ ، آئی اِلم ءُ زانت مرچی مئے بلوچ ءِ ھمک پرزند ءِ تہ ءَ جاگہ کرتگ وتی نیک ءُ بدّ ءَ زانت پہ بلوچ ءِ وشیں باندات ءَ اِلم ءِ دربرگ ، انگت برجاہ اِنت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔