زاھد بلوچ ءِ بیگواھی ءَ ھپت سال سرجم بیگ ءَ ٹوئٹر ءَ کمپئن بیت اِنت

زاھد بلوچ ءِ بیگواھی ءَ ھپت سال سرجم بیگ ءَ شال ءَ زھرشانی کنگ بیت اِنت ءُ ٹوئٹر ءَ کمپئن کنگ بیت، بیگواھیں مردمانی کھول اسلام آباد ءَ سر وزیر پاکستان عمران خان ءَ دُچار کپ اَنت –

بلوچ نودربر گل ءِ گوستگیں سرکماش زاھد کرد ءِ بیگواھی ءَ ھپت سال سرجم بیگ ءَ آئی ءِ کھول ءِ نیمگ ءَ شال ءِ پریس کلب ءِ دیم ءَ زھرشانی کنگ ءِ جار جتگ ءُ ٹوئٹر ءَ #SaveZahidBaloch ءِ کمپئن ءِ جار جتگ –

کھول ءِ رد ءَ ھژدہ مارچ ءِ بیگاہ ءَ شال ءِ پریس کلب ءِ دیم ءَ زاھد بلوچ ءِ ھپت سال بیگواھی ءَ بیگاہ ءِ ساھت سَے ءَ یک زھرشانی کنگ بیت اِنت ءُ زھرشانی ءَ سرجمیں تکاں بندوکیں مردماں بھر زورگ ءِ دزبندی کنگ بیتگ –

ھمے وڑ ءَ زاھد بلوچ ءِ لوگ بانک زرجان بلوچ ءَ وتی چاگردی رسانک جاہ ٹوئٹر ءَ گوشتگ کہ یک مردمے ءِ بیگواہ بیگ ءَ ھپت سال گوزگ کسانوکیں گپے نہ اِنت اے درد ءُ گماں من زاناں ءُ بلوچستان ءَ بیگواھیں مردمانی کھول زان اَنت –

زرجان بلوچ ءَ گوشتگ کہ زاھد بلوچ ءِ مات ءَ ودار وداراں داں آئی ءَ وتی گرانیں گم آسودگ کرتگ ءُ اے جھان ءَ شتگ بلے مئے انگت ءَ زاھد بلوچ ءِ راہ ءَ چاریگ اَنت –

زانگ بہ بیت زاھد بلوچ بی ایس او آزاد ءِ گوستگیں سرکماش اِنت ءُ ھژدہ مارچ دوھزار ءُ چاردہ ءَ شال ءَ آوار جنگ بیتگ ءُ آئی ءِ آوار جنی ءِ چم دیدیں مردمانی تہ ءَ یکے بانک کریمہ بلوچ بیتگ ءُ کریمہ بلوچ بی ایس او آزاد ءِ سرکماش بیتگ ءُ گوستگیں وھداں کینیڈا ءَ بیگواہ بیگ ءَ پد آئی ءِ لاش دزکپتگ –

بی ایس او آزاد ءِ بازیں رھوشون ءُ باسکے گار ءُ بیگواہ اَنت ءُ بازینے کُشگ ءُ چگل دیگ بیتگ اَنت-

بی ایس او آزاد ءِ گاریں رھشونانی تہ ءَ انفارمیشن شبیر بلوچ ھوار اِنت کہ آئی ءِ کھول ءَ گوستگیں وھداں اسلام آباد ءَ زھرشانی نندانک ءَ بھر زرتگ –

ھمے رنگ ءَ وائس فار بلوچ مسنگ پرسنز ءِ سروک نسر اللہ بلوچ ءَ وتی شنگ کرتگیں بیان ءِ تہ ءَ گوشتگ کہ پشمبے ءِ روچ ءَ پاکستان ءِ بنجاھی شھر اسلام آباد ءَ سروزیر پاکستان عمران خان ءَ دُچاری بیت اِنت –

بیگواھیں بلوچانی یل کنگ ءِ واستا آیانی کھولاں ھمے سال ءِ فروری ءَ اسلام آباد ءَ زھرشانی کرتگ کہ دَہ روچاں ڈی چوک ءَ زھرشانی نندانک ءَ بیگواھیں مردمانی کھولاں سر وزیر عمران خان ءَ مارچ ءِ ماہ ءَ سدکی دیگ ءَ زھرشانی نندانک ھلاس کرتگ اَت –

اے گند ءَ نند ءِ دوچاری بیگواھیں ڈاکٹر دین مھمد ءِ جنک سمی دین ءَ راستی کرتگ –

لس رداں سر وزیر پاکستان ءَ بیگواھیں مردمانی کھولانی گون ءَ دُچار کپگ ءَ پوجی سروکاں ھم بیگواھیں مردمانی بارہ ءَ سرپدی زرتگ –

مروچیگیں گند ءُ نند ءَ بلوچستان ءَ گار ءُ بیگواھیں مردماں ھوار دیم پہ دیمی جنگ ءَ جنگ بیتگیں مردمانی کوشانی سر ءَ گپ ءُ تران بیت اِنت –