بلوچستان ءِ جتا جتائیں وئیلاں سَے مردم بیران ، دو ٹپی

سربوتگیں ھالانی رِد ءَ بلوچستان ءِ دمگ مستونگ، شال ءُ مکران کوسٹل ہائی وے ءَ دگ ءِ وئیلاں دو مردم بیران دو ٹپی بوتگ وھدیکے پنجگور ءَ تیر لگگ ءِ سوب ءَ یک مردمے بیران بوتگ –

گیشیں ھالانی رِد ءَ بلوچستان ءِ دمگ مستونگ ءَ شال داں کراچی شھدگ ءِ سر ءَ دگ ءِ وئیل ءَ دو مردم بیران بوتگ اَنت –

وئیل کھڈکوچہ ءِ دمگ بدرنگ ءَ دیم ءَ اتکگ کہ گاڑی ءِ چپی بوگے سوب ءَ اسد اللہ ءَ ھوار دو مردم بیران بوتگ اَنت – ریسکو ءَ مردمانی جون دست گپتگ انت دمگی نادراھجاہ ءَ سر کتگ انت –

ھمے وڑ بلوچستان ءِ بنجاھی شھر شال ءَ دگ ءِ وئیل ءَ یک مردمے ٹپی بوتگ –

پولیس ءِ رِد ءَ شال ءِ دمگ سریاب کسٹمز ءِ نزیک ءَ ٹرک ءَ موٹر سینکلے ٹکر جتگ چریشی ءَ اسلم نامیں مردمے ٹپی بوتگ – پولیس ءَ ٹپی بوتگیں مردم چست کتگ ءُ دمگی نادراھجاہ ءَ سر کتگ –

مکران کوسٹل ہائی وے ءَ تیز رؤگ ءِ سوب ءَ گاڑی ءِ چپی بوتگ – چپی بوگے سوب ءَ عبدالحمید ء خدا بخش نامیں مردمے ٹپی بوتگ، ٹپی بوتگیں مردم نادراھجاہ ءَ برگ بوتگ –

دومی نیمگ ءَ بلوچستان ءِ دمگ پنجگور ءَ ناگتی تیر ءِ لگگ ءِ سوب ءَ یک مردمے بیران بوتگ –

لیوز بنشون ءِ رِد ءَ پنجگور ءِ دمگ پروم ءَ ناگتی تیر لگگ ءِ سوب ءَ خداداد ء بدل خان بیران بوتگ –